Falcao-a'n theihtawp chhuah zel dawn

Colombia striker Radamel Falcao hi nikum September thla kha chuan footballer zinga sawi hlawh ber a ni pha hial ang. Nipui transfer tawp zanah Falcao hian loan-in Monaco aṭangin Manchester United a zawm a, English club hian Falcao chhawr tur hian pound maktaduai ruk an chawi.

Beiseina sang tak nena United supporter-te thlir Falcao a hlawhchham a, senior team-ah player pawimawh a ni pha lo. Tun season-ah vawi 22 inlan tawhin goal li chauh a la khung a, chutichung chuan season tawp thleng theihtawp a chhuah tur thu a sawi.

Falcao chuan, "Club tan kan theihna zawng zawngin ka khel ang. Match riat a la awm a, engpawh a la thleng thei a ni. Inelna zawh hunah season thara ka khelhna tur chu uluk takin ka ngaihtuah chauh ang," tiin a sawi.

Colombia striker chuan a dinhmun chu sawi zau deuhin, "Van Gaal-a'n thutlukna a siam a ngai a, a thutlukna chu ka duh dan a ni kher lo thei bawk. Ka tih theih awmchhun chu professional taka theihtawp chhuah chhunzawm a ni a, ka hun neih ang hman ṭangkai a ṭul a ni," tiin United-a cham hlen turin khelh ṭhat a mamawh thu a sawi.

Falcao chuan, "Ka kal zelna tur hi an in rin siak a, hetiang lam hi chu kalsan zel ka duh. Ka hmaa thil ṭha awm tawng fuh turin ka buai ve a thiang lo. Club-ah ka hlim a, supporter leh teammate te nen kan inkar boruak a ṭha a. Manchester United tan a tawp thlengin theihtawp ka chhuah ang," tiin a sawi.

Colombia hian zanin dar 10:30 hian Bahrain nen friendly match an khel ang a, Thawhṭanni zanah Kuwait an hmachhawn leh ang.

Colombia boss Jose Peker­man chuan, "Falcao hian inrin­tawkna nasa takin a hloh a, amah hi ka hrechiang a. A dinhmun hi siam ṭhat theih a ni," tiin a striker-ah rinna a la nghah reng thu a sawi.