Aegon Championships khelh tum Nadal
World number 3 Rafael Nadal chuan Wimbledon khel hmain Aegon Championships khelh a tum thu a sawi. He inelnaah hian kum 2011 hnuah a vawi khat inlan leh na tur a ni ang.
Kum 2008 khan Aegon Championships-ah hian Nadal hi a lo champion tawh a, he mi kum vek hian a vawi khat nan Wimbledon-ah a champion zui bawk.
Kum 28-a upa Spanish tennis khel thiam hian kum 2012 leh 2014 khan Wimbledon inbuatsaih nan Aegon Championships khel loin Germany-ah Halle Open a lo khel tawh a ni.
Nadal chuan, "He hmuna ka inkhel leh thei tur hi ka lawm, a court leh grass te hi Wimbledon khelhna tur nen a inan em avangin ka tan chuan a ṭangkai leh hle ang. A boruak a nuamin he hmunah hian tennis-in ngaihhlut a hlawh em em a, khelmual awm dan zawng zawng te hi duhthusam leh beisei phak bak a ni," tiin a tournament khelhna tur chu a fak hle.
Kuminah hian Nadal hi a la khel ṭha rih lo hle a, Australian open-ah Tomas Berdych hneh loin quarter final-ah a tla a, hemi hnu hian Rio Open, Argentina Open leh Indian Wells te a khel leh a, mahse heng tournament-ah hian nomawi a hlawhchhuak zo lo vek.
British number 1 Andy Murray, US Open champion Marin Cilic, champion lai Grigor Dimitrov leh kum 2014 Australian champion Stan Wawrinka te pawhin Aegon Championships hi khelh an tum a ni.