England-in World Cup 2026 thleng maithei

Football atchilh na England-ah kum 2026 World Cup 'The greatest Show on Earth' chu an nghah a nih maitheih thu Football Association chairman Greg Dyke chuan a sawi.

Kum 1966 khan England hian World Cup hi an lo thleng tawh a, an champion nghe nghe. Hemi hnu hian an la champion leh lo. Football ngaina ram ni mah se kum 49 chhung zet chu an beisei leh tum ram hi an thleng thei tawh lo a ni.

Ruahman kal chhoh dan tur chu Sepp Blatter-a thuneihna chan chhun zawm zel leh zel loh bakah David Gill-a'n FIFA executive committee-a a hmalak chak theih danah a innghah thu a sawi bawk.

FA chairman Dyke chuan, "Kan ruahman anga thil a kal thei anih bakah David-a'n thlen min tiam theih a, thil fair taka a kal a nih chuan kan thleng thei ang," tiin a sawi.

Tunah hian FIFA president Blatter hian a ṭum li nan thuneihna a chang mek. June 8, 1998 khan a vawi khat nan FIFA president atan thlan a ni a, a hnu kum 1998, 2002, 2007 leh 2012 khan thlan nawn leh a ni. Kumin May ni 29 hian FIFA inthlan a awm leh dawn a, he inthlanah hian an thlang nawn leh a nih chuan England-in World Cup 2026 an thlen leh thlen loh tur chu Blatter kutah hian a innghat lian hle. 2026 World Cup thleng tur hi kum 2017 khian thlan fel a ni tawh dawn.

England hian kum 2018-a World Cup khelh tur hi thlen an lo dil tawh a, mah se an beisei angin thil a kal thei lo. Russia chu thleng tur a thlan an ni ta zawk. Hemi ṭum hian England chu palinaah awmin vote hnih chauh an hmu a ni.

Report ṭhenkhata tarlan danin kum 2018-a Russia-in an thlen tur leh 2022-a Qatar-in an thlen turah hian eirukna leh thil felhlel a awm nia ngaih a ni a, mahse he thu hi finfiah a ni lo.