Atletico Madrid manager Diego Simeone-a'n contract pawtsei

Atletico Madrid manager Diego Simeone chuan a contract neih lai pawt seiin kum 2020 thleng cham turin club nen inremna an siam.

Argentine manager hian kum 2011 aṭangin Atletico hi a enkawl ṭan a, beisei phak bakin hma a sawmpui a ni. Copa del Rey a chawipui tawh bakah, a enkawlna hnuaiah hian kum 2012 khan Europa League-ah an champion. Kum 1996 hnua a vawi khat nan nikum khan khawvela player ṭha leh manto rual awmkhawmna Barcelona leh Real Madrid lehpelin Spanish La Liga champion an ni bawk. He bakah hian Champions League final hruai thlengin final-ah Real lakah an vanduai a ni.

Atletico a chetṭhat pui em avang hian khawvela manager ṭha berte zingah chhiar tel a ni tawh a, Europe club hrang hrang nen pawh sawi zawm a lo ni tawh. English champion Manchester City nen pawh sawi zawm a lo ni tawh a ni. Mahse, a club tan a rinawm zia tih lan nan a contract a pawt sei leh ta zawk a ni.

Kum 44-a upa Simeone chuan, "He lai hmuna awm zel ka duh chhan chu club-in hma a sawn zel vang hi a ni. Kan theihna leh tumruhna hmangin hmalam pan zel kan duh a ni tih ka hmuh hian he lai hmun a awm ka thlang hi ka tisual lo hlein ka hria," tiin a sawi.

Argentine manager chuan sawi chhunzawmin, "Tunah hian kan elpui ṭhenkhat Sevilla, Valencia, Villarreal te hian nasa takin hma an rawn sawn chhoh avangin keini pawhin nasa leh zual a kan beih a ngai a ni. Kan club sum dinhmun mil tawkin hmalam kan pan zel ka beisei a, midang thil tih dan thlir loin keimah niin ṭha leh dik ni a kan ngaih angin kan kal zel tur a ni," tiin a sawi.