Kartawpah Euro 2016 Qualifiers

Bundesliga-ah Bayern Munich an chak lo a, La Liga-ah El Classico kan thlir zo chauh a, Premier League season tawp inum a ngaihnawm bawk. Amaherawhchu, tun karah erawh international break a awm dawn avangin club football ngaihnawm kalsanin ram inkhel luh chilh thung ang.

Euro 2016 Qualifiers

February 23, Pathianni khan Nice, France-ah UEFA European Championship 2016 khel tur ramte group hrang hrangah ṭhendarh an ni. A thlengtu France tana quali­fier khelh a ngaih loh avangin ram 53-in hmunruak 23 an inchuh dawn a ni.

Qualifier chu

European Qualifier khel tur hian ram 53 chu group kuaah ṭhendarh an ni a. Group A-H ah team paruk zel awmin, Group I-ah team panga chiah an awm thung. Qualifier khelh apiangin Group I zinga team awl hian France nen friendly match an khel ṭhin.

Euro 2016-ah team 24 an tel dawn a, a thlengtu France tan qualifying khelh a ngai lo a; group tina hmahruaitu leh pahnihna bakah group hrang hrang pathumna zinga ti ṭha ber chu an tling ve leh bawk ang. Pathumna ni pha pariat dang te'n hmunruak pali la awm chu playoff hmangin an inchuh dawn a ni.

Thlirlawkna tawi

Group A-ah 2014 FIFA World Cup-a pathumna Netherlands-in Czech Republic leh Iceland an hneh lo tawh a, mah se Kazakhstan leh Latvia an hneh avangin pathumnaah an awm mek. An dinhmun a him lo.

Group B-ah World Cup-a che ṭha Belgium an che fuh bik lo. Star rual awm­na Belgium hian Andorra hnehin bul an ṭan a, amaherawhchu Wales leh Bosnia-Herzegovina te an draw thung. Israel ram buai vangin fixture tih danlgam a ni a, Israel-in vawi khata khel tlem chunga pakhatna an nih theih laiin Belgium erawh palinaah an awm.

Ryan Giggs-a'n a vanglaiin inelna lianah Wales a kai pui zo lo a, khawvela player manto ber Gareth Bale erawh Wales pahnihna a nih pui mek. Vawi 10 khelh tur awmah vawi li chauh an la khel a, hmabak a la ko hle.

Group C-ah Spain an awm a, hmahruaitu erawh Slovakia an ni daih. Spain hian Slovakia an hneh lo a, Napoli captain Marek Hamsik te ram hi Spain nena tling tura rinkai an ni.

Group D-ah World champion Germany an awm a, captain Philipp Lahm awm loh hnuah Joachim Low naute hi an insiam rem mai bik lo. Group hmahruaitu Poland an hneh lo a, Republic of Ireland an draw bawk.

Group E-ah World Cup-a mualpho England an che ṭha, match li khelh tawhah an la chak vek. Wayne Rooney captain-na hnuaiah England hian goal 11 an khung tawh a, goal khat chiah an la chhuah.

Group F-ah Euro 2004 champion Greece-in point khat chiah an la hmu a, table mawng­phahah an awm. He group hi tling tur hriatthiamna ber a ni hial ang.

Group G-ah Russia leh Sweden an awm a, a chung bera awm erawh Austria an ni. Zlatan Ibrahimovic captain-na hnuaia khel Sweden hian chak loh la nei lo mah se vawi thum lai draw an neih tawh.

Group H-ah rinlawk ang ngeiin Italy leh Croatia te an intluk tawk a, vawi li khelah point 10 ve ve an hmu tawh. Ram lian pahnih elpha tur chu pathumnaa awm Norway an ni.

Group I-ah Denmark-in hma an hruai a, match khata an khelh tam avangin an hnuai chiaha awm Portugal-in an la lehpel thei. Serbia-in beisei an pha lo a, Denmark leh Portugal hi rinkai an ni.