I League 2nd Division Fixtures April 16-ah Aizawl FC Vs Chanmari FC
India ram club-te tana football inelna sang ber dawttu I League 2nd Division chu Pathianni aṭang hian Siliguri-ah khelh ṭan a ni dawn.
Siliguri-ah hian leg 1 khelh a ni ang a, inelnaa tel team pariat Aizawl FC, Chanmari FC, Hindustan (Delhi), Kenkre (Mumbai), Lonestar Kashmir (Jammu and Kashmir), Mohammedan (Kolkata), PIFA (Mumbai) leh United Sports Club (Kolkata) te vawi khat ṭheuh an inkhel chhuak vek ang. Leg 2 hi Golaghat, Assam-ah khelh tur a ni a, AIFF-in fixture an la ti chhuak lo.
Mizoram pawnah Mizoram Premier League club te an inhmachhawn dawn a, Aizawl Derby a tih theih. A hming chu eng pawh ni rawh se Aizawl FC leh Chanmari FC te hi club inel tawk tak a ni a, MPL-a champion ve ve tawh niin ṭha ber nih duh ve ve an ni.
April 16 khian Kanchenchunga Stadium-ah MPL3 final rematch a en theih dawn a, inelna ṭan hma hauhin local football tuite chuan he fixture hi an ngaihven ṭan der tawh. An inkhelhna hmun hi Mizoramin Santosh Trophy nomawi an chawina hmun kha an ni a, Chanmari FC-ah champion team player an tam zawk. Amaherawhchu Aizawl FC tan zamna tur a awm lo, Chanmari FC an hmachhawn hmain club dang paruk an khel dawn a, field an hre bel hman ang. Tin, kuminah Aizawl FC record a duhawm zawk, MPL-a an champion bakah an player ṭhahnem tak telna Mizoram team chu National Games-ah gold medal an dawng.