Mayweather - Pacquiao inhnek man a to dawn

Khawvel boxing chanchina inhnek ropui ber tura ngaih Floyd Mayweather Jr. leh Manny Pacquiao te inhnek ni a hnai telh telh a, boruak pawh a lian zual zel. An inhnekna aṭanga sum lut tur ringawt pawh a tam tham a, khawvel combat sports chanchina sum tamna ber ni tura beisei a ni a, dollar makatduai 400 chuang he inhnek hian a hui lut tura ngaih a ni.

Khawvel pumpuiah en chak an tam a, a hmun ngeia chhim tum pawh an tam hle. MGM Grand Garden Arena, Las Vegas-a inhnek tur hian ticket aṭang ringawtin dollar maktaduai 74 a hui lut tura beisei a ni a, ticket hi 15,000 siam a ni. Ticket-a sum lut tur hian September 2013-a Mayweather leh Canelo Alvarez te'n middleweight fight an neih ṭuma ticket aṭanga sum lut zat dollar maktaduai 20 a khum chiang hle.

February thla tawp lama Mayweather leh Pacquiao te inhnek tur tihchian a nih khan Pacquiao promoter 'Top Rank company' leh Mayweather promoter 'Mayweather Promotion' te chuan dollar maktaduai 40 vel gate ticket aṭang hian lakluh an inbeisei a, ticket man zat tura an ruahman pawh $1,000 (Rs 62,265) aṭanga $5,000 (Rs 31,1325) a ni. Mahse, an beisei aia nasain he inhnek tur ngaihven tu hi an tam a, ruahmanna hmasa hi thaiboin $1,500 (Rs 93,397) aṭanga $7,500 (Rs 46,6987) inkarah tikcet man hi tihsan leh a ni a, dollar maktaduai 50 hmuh beisei a ni. Hetah hian an la duhtawk lo cheu, tunah chuan mipui lam demand na a nasat zel avangin ticket man hi tihsan belh leh tawh niin a to ber chu $10,000 (Rs 62,2650) a ni anga, sum lut tura beisei zat pawh dollar maktaduai 74 zet a ni ta.

Top Rank chairman Bob Arum chuan, "Mipuiin an ngaihhlut dan em em hi a awihawm loh zawk a ni. Mahse, hei hi thil tak tak, a tak ngeia thleng chu a ni miau si," tiin ticket aṭanga sum lut tur tam zia leh mipui demand nasa lutuk chu mak a tih thu a sawi.

Mayweather leh Pacquiao te inhnek tur hi kum ruk chhung loin mung tawh a nih vangin boruak a nei hrim hrim a, pay-per-view lamah pawh record siam tura beisei a ni. Pay-per-view aṭanga boxing-in entu a ngah ber chu kum 2007 khan niin Mayweather leh Oscar De La Hoya te inhnek kha mi maktaduai 2.4 in an en.

Khawvel hmuh chak inhnek hi pay-per-view a entu mi maktaduai 3 chuang an awm rin a ni a, pay-per-view aṭanga en man hi $100 a nih avangin sum lut tur zata beisei hi dollar maktaduai 300 a ni. Hei pawh hi USA, Canada leh Puerto Rico ram chhung bik chauh aṭanga chhut a ni a, khawvel hmun dang aṭanga pay-per-view kaltlanga sum lut tur zat a beisei hi dollar maktaduai 35 ni tura rin a ni.

Television sales aṭanga sum lut tur zat ringawt pawh hi chil ti put tham a ni. Pacquiao-a te ram Philippines a Television channel pakhat Solar chuan an ram chhunga he inhnek ropui tur chhuah phalna an nei tawh a, dollar maktaduai 10 in chhuah phalna hi an lei. Mexico rama television channel-in hal ber pawl pahnih Azteca leh Televisa meuh pawh Mayweather leh Pacquiao te inhnek chhuah tur chuan an inthurual thei a, dollar maktaduai 2.3 in Mexico ram chhunga he inhnek chhuah phalna hi an lei a, an channel-ah ve ve a rual in an chhuah ang. USA chhiar tel miah loa khawvel hmun hrang hrang aṭanga Television sales kaltlanga sum lut tur ringawt hi dollar maktaduai 120 vel nia chhut a ni.

Beer company pahnih Tecate leh Corona te'n title sponsor nih an inchuh a, Mayweather rei tak lo sponsor tawhtu Corona in dollar maktaduai 5.2 an theh chhuah theih laiin Pacquiao sponsor ṭhin tu Tecate an inhuam sang zawk a, dollar maktaduai 5.6 chhawp chhuakin title sponsor an ni dawn.

Pacquiao promoter Top Rank chairman Bob Arum, "Inhnek hun tura kan ruahman hun fuh zia hi kan hmu chiang tawlh tawlh a ni. Kum nga liamtaah khan he inhnek hi lo huaihawt ngat ila chu tuna kan sum beisei zat ang hi kan beisei ngam kher lo ang. Tunah chuan mipuiin an nghahlelh tawh em avangin sum lut a tam phah a, a hun takah inhnek hun hi kan buatsaih niin ka hria a, kan tifuh takzet a ni," a ti.

Khawvela inhnek ropui ber tura ngaih aṭanga sum lut tur zawng zawnga 60% hi Mayweather te lamin an chang anga, Pacquiao te lam hian 40% an chang dawn thung a ni.