Cincinnati Masters champion Djokovic

Novak Djokovic chuan Milos Raonic hnehin Western and Southern Open nomawi a chawi a, Grand Slam dawt chiaha inelna ngaihhlut Masters 1000-ah vawi 35 a champion tlinna niin, record nei ṭha ber Rafael Nadal a nih rual chiah.

Inrinni zan final inkhelah world number 1 Djokovic hian 1-6, 6-3, 6-4 in hnehna a chang. World number 30 Raonic-a'n set hmasa ber hi minute 30 chhungin a la a, set hnihnaah pawh Serbian tlangval hi 2-0 in a hnufual leh nghal.

Mahse tawnhriat nei ṭha leh theihna nei sang zawk Djokovic a talbuai rei duh lo, set hnihna an khelh laia game thumna aṭanga tho chhuakin a tawp thlengin a hawi kir tawh lo - darkar hnih chhungin hnehna a chang.

Canadian tlangval Raonic-a'n Novak a hmachhawn hnuhnung vawi 10-ah hnehna a chang ve miah lo a, tun ṭuma final an khelhah erawh bul a ṭan fuh hmasak avangin beisei a nei sang hman hle. Mahse nidang ang bawkin a tawp lamah a talbuai zui leh a ni.

Grand Slam hnuaia inelna lian Masters 1000 hi kum 2009 aṭang khan an siamrem a, season khatah tournament pakua a awm ṭhin; heng inelna pakua a champion kim thei awmchhun chu Djokovic chauh hi a ni hial.

Kum 33 mi Djokovic chuan, "Nomawi hi a theih anga tam chawi ka duh a, chumi tur chuan tournament ka khelh zawng zawngah theihtawp takmeuh ka chhuah ṭhin. Hun harsa kan paltlang mek lai hian inelna hmachhawn turin taksa leh rilru a inpeih," tiin a sawi.

Zanin aṭang hian US Open khelh chhunzawm nghal a ni dawn a, seeded pakhatna Djokovic-a'n a match hmasa ber atan Thawhlehni zing dar 4:30 hian Damir Dzumhur a hmachhawn ang - hahchawlhna hun nei mumal loin inelna lian a hmachhawn leh nghal dawn.

Cincinnati Masters-ah hian hmeichhe final khel tur Naomi Osaka chu a malpui vei lam hiam vangin a inhnukdawk a, a khingpui tur Victoria Azarenka chuan inkhelh hah ngai loin nomawi a chawi.

Japanese nula Osaka hian US-a mihang an kah vangin semifinal a khelh loh tur thu a sawi a, a hnuah khel leh hnuhnawhin final hial thleng mah se hliam vangin a buai chhunzawm. US Open atan pawh 100%-a fit a nih hman a beisei loh thu a sawi zui hial.