Kane hmasawn chak dan hi a mak - Carrick
England midfielder Michael Carrick chuan ram tana a teammate Harry Kane a hmasawn chak dan em em chu a mak zawk hian a ni tiin a sawi.
England tan a vawi 33 khel tawh Carrick hi kum 2013 October a Slovenia nen an inkhelh hnuah ram tan a la inlan leh lo a, tun ṭumah hian coach Roy Hodgson chuan a ko tel ve leh a ni.
Kum 21-a upa Tottenham striker Kane hi a vawikhat nan Lithuania leh Italy hmachhawn tur England squad-ah koh tel a niin a vawi khat nan ram tan a khelh ngei beisei a ni.
Spurs forward hi tun season-ah a club tan a khel ṭha tluang hle a, inelna hrang hrangah goal 29 a thun tawh a, Premier League-ah bik goal 19 khung tawhin Manchester City striker Sergio Aguero nen an thun zat a inzat chiah. Tun hmain Kane hian inkhel a hmachhawn tawhah goal 21 chauh ala khung a, tun season nen a khaikhin chuan a inthlau rem rem hle.
Manchester United midfielder Carrick chuan, "Hma a sawn dan hi kan hmuin kan hre vek a, tunah hian hma ala sawn mek zel. Hetiang zel a hma a sawn chho a nih chuan a hmalam hun a eng hle ang. Tunah hian kan team-ah striker ṭha tak tak pali kan nei meka chung zingah chuan Kane pawh hi a tel, midangte nen khelhna hmun chan tumin an inel dawn a ni," tiin a sawi.