Chanmari FC an inpeih tawh
Mizoram Premier League season 3 champion Aizawl FC-in nimin khan Aizawl an chhuahsan a, MPL2 champion Chanmari FC erawh March 21, Inrinni khan khelhna hmun tur Siliguri an thleng kim tawh.
Chanmari an phur
Santosh Trophy-a Mizoram team enkawltu chu veteran coach H. Vanlalthlanga a ni a, Chanmari FC kaihruaitu pawh Thlanga tho a ni.
College Veng pachal hian local football-ah record ṭha tak tak a lo hnutchhiah tawh a, hlawhtling taka Sports and Youth Services FC a enkawl hnuah Chanmari FC-ah a lut a, record ṭhain a um zui nghal.
Thlanga hian Chanmari FC hia season hmasa berah MFA Cup-ah a champion pui a, season hnihnaah MFA Super Cup, I Day Football leh MPL-ah te a champion pui a. Hemi kum vek hian Mizoram team chu Santosh Trophy-ah a champion pui bawk. Veteran coach Thlanga tan I League 2nd Division hi a vawi khat hmachhawnna tur a ni a, chona thar a ni.
Chanmari FC coach chuan, "Boruak ṭha tak hnuaiah Siliguri-ah training-na hun kan nei thei a, I League khel turin beseina sang tak kan ni a, kan hma lam hun erawh vannei leh vanduai a ni," tiin a sawi.
Chanmari ṭha zawk
I League second division khel tur Chanmari hi MPL-a kan hmuh ai khan an ṭha zawk.
Mizoram Police player pawimawh pathum midfielder V. Lalṭanpuia, MPL3 top scorer Lalbiakhlua leh MPL1 best forward F. Lalrinpuia te an la lut a, ṭhat pui tham an ni.
Anni bakah hian ISL club Mumbai City FC aṭangin Lalrinfela an la lut bawk. Rinfela hi player tawnhriat nei ṭha a ni a, Chanmari FC-ah a career tih nun thar a tum mek.
Foreigner pahnih an nei thar a, Reitlang FC innghahna Patrick Arol Enonji an la lut. Cameroon footballer hi defender aṭanga forward thlenga chhawr theih a ni a, Chanmari-ah hmuh pawimawh a chan a rinawm. I League lama tawnhriat nei tawh Nigeria forward Yinka Joel Sunday an la lut a, ani hi nikuma Mizoram-a I League second division khelh a nih ṭum khan Kalighat MS player ṭangkai a ni.
Siliguri Mizo
Mizoramin Santosh Trophy nomawi an chawi ṭum khan Siliguri Mizote hneh aṭangin ṭawiawmna an nei ṭha hle. Tun ṭumah hian Siliguri Synod Mission Field-a field secretary Zobiaktluanga'n Chanmari FC team-te thlenna tur hi a lo buaipui sak a, a chungah Chanmari FC hruaitute an lawm hle.
Chanmari FC Squad
# Hming Address
GOALKEEPER
1 Lalawmpuia Aizawl Venglai
2 Malsawmdawngliana Chanmari
3 H.Lalremruata ITI Veng
4 Lalruatpuia College Veng
DEFENDER
5 Lalrinchhana Tochhawng Chanmari
6 C. Lalrosanga Lunglei
7 Lalhriatrenga Chanmari
8 Zohmangaiha Ralte ITI Veng
9 Patrick Arol Enonji Cameroon
10 Lalruatthara Venghlui
11 Zothanpuia Bethlehem
12 Ricky Lallawmawma Durltang Leitan
MIDFIELDER
13 Lalruatdika Chaltlang/Darlawn
14 Rochhingpuia Chanmari
15 H. Lalmuankima Bawngkawn
16 Laldingngheta Bethlehem Vengthlang
17 Lalruatfela Republic Vengthlang
18 Laldinpuia Aizawl Venglai
19 Lalbiakhlua Electric Veng/Keifang
20 Lalrinfela Khawlailung
21 Lalṭanpuia Electric Veng/Tlungvel
FORWARD
22 Joseph Lalnunpuia Salem Veng
23 Malsawmfela Ramhlun South
24 F.Lalrinpuia Republic Veng
25 Yinka Joel Sunday Nigeria