Zanin aṭangin US Open

Tennis inelna lian US Open chu zanin aṭang hian Flushing Meadows, New York-ah khelh ṭan a ni dawn. Player langsar tam tak inlan dawn lo mah se a langsar ṭhenkhat inlan tur an awm tho a, tennis ngainatute tan tournament an khel thei tur hi chanchin lawmawm a ni tho.

Champion lai Rafael Nadal leh Bianca Andreescu te chu Covid-19 vangin an inlan thei dawn lo. Novak Djokovic, Andy Murray leh Serena Williams te chu mipui mit fukna tur an ni ang - rawlthar beiseiawm ho an inlan bawk ang.

Tournament director Stacey Allaste chuan, "Player leh inelna buatsaihtu lam zawng zawng tan pawh inenchhinna ṭha tak a ni dawn. Tun hma lama kan la hmuh ngai loh leh hriat ngai loh angin US Open kan khel dawn.

"Coronavirus vangin hun rei tak chhung chu khawvel pumah infiamna a chawl ṭhuap a, khawvel huap tournament buatsaih leh thei tur hmasa kan ni hi ka lawm, hripui leng karah pawh a êng lam thlir tur a awm tihna a ni," a ti.

Mipa singles lamah chuan Roger Federer, Nadal leh Nick Kyrgios te chu inlan thei lo tur langsar an ni. Djokovic chu champion tura rinkai ber a ni, chutihrualin Donimic Thiem, Daniil Medvedev, Alexander Zverev leh Stefanos Tsitsipas te an awm avangin nomawi chawi a awlsam lo ang.

Hmeichhe singles lamah chuan player ranking sang zual 10 zinga pali chauh an inlan thei dawn. World number 1 Ashleigh Barty, Simona Halep (2), Elina Svitolina (5), Kiki Bertens (7), Belinda Bencic (8) leh champion lai Andreescu te an inlan dawn loh avangin kum dang a phak dawn lo.

Serena tan Grand Slam nomawi 24-na chawi theihna kawng a inhawng zau dawn. Amaherawhchu American star hi Cincinnati Masters khelh zawh takah last 16 paltlang zo loin a tla. World number 3 Karolina Pliskova, 2018 champion Naomi Osaka leh Australian Open champion Sofia Kenin te nen thleng sang tura rin an ni.