India-in final an thleng zo ta lo

India in a zawna ICC World Cup final luh a tum na chu a thamral ta a, nimin khan semi-final hnuhnung zawk inkhelah World Cup thlengtu pakhat zawk Australia chu run 95 in an hneh lo.

Syndey Cricket Ground, Sydney-a inkhelah hian Steven Smith chuan Australia tan century a hlap chhuak a, run 81 vawchhuaktu Aaron Finch-a'n alo thlawp ṭha bawk nen, India in Australia an chelh ding zo ta lo a ni.

Ṭhumvawra vannei zawk Australia in bat hmasak an thlang a, an thlang sual lo. Match sarih an khelh tawhah an khingpui batsman te vawm out vek zel tu Indian bowler te'n Australia batsman te an ngam lo a, over 50-ah mi pasarih chiah vawm out in Australia in run 328 an tlin thei. Australia tan Steven Smith chuan run a vawchhuak hnem ber a, ball 93-ah run 105 a vawchhuak. India bowler zingah Umesh Yadav a che ṭha ber a, run 72 pe in wicket li a la.

India in an target hu­phurhawm tak hi umin bul an rawn ṭan a, Rohit Sharma leh Shikhar Dhawan te'n beiseina sang tak nen bul an rawn ṭan. Mahse, South Africa laka century hlapchhuaktu Dhawan chu ball 41 a hmachhawnah run 45 a vawchhuak tihin a out a, India inkhel nung tak a ti zuai.

India beiseina dang Virat Kohli-a'n ball 13 a hmachhawnah run 1 chiah vawchhuakin a out. India batsman te an out phuk phuk a, a tawpah batsman pangngai la awmchhun, boruak sang tak hnuaia khelh thiam captain MS Dhoni a rawn penchhuak. Dhoni hian ball 65 a hmachhawnah run 65 a vawchhuak a, a out hnuin batsman pangngai an awm tawh loh avangin India beiseina a thi ve nghal.

Over 46.5 an khelh thlen meuh chuan India in run 233 an tlin thei hram a, an vaia out vekin Australia an chak ta zawk a ni.

Eng nge an sawi?

Australia captain Michael Clarke chuan, "Nuam ka ti takzet a ni.Smith khan a khel ṭha takzet a, kan bowler te'n an khel ṭha hle bawk. MS Dhoni leh a team te'n an khel ṭha takzet a, World Cup match ropui tak tak min entir a ni. Dhoni hi a chawlh mai ka la ring lo a, World Cup dang a la khelh leh ka beisei tlat a ni," tiin Dhoni chawlh leh chawlh loh chungchang boruak a sawi lang.

Final thlir lawkin Clarke chuan, "Kan inbuatsaihna a ṭha em em a, group stage-a New Zealand kan hneh lohna khan harhtharna min chan tir a ni ber mai. Final-a New Zealand khel turin kan rilru lam a inpeih tawh a ni, " a ti.

India captain MS Dhoni chuan, "Australia khan an khel ṭha takzet a, chak kha an phu a ni. Kan fast bowler te'n duh angin an vawm ṭha tawk lo a, kan lower order batsman te'n insiam ṭhat an mamawh hle bawk. Dhawan khan free taka bat na hun ṭha a nei a, duh aiin a hmanhmawh mah mah a ni. Ka World Cup tawp ber a nih dawn leh dawn lohah thutlukna ka la siam lo," tiin chawlh chungchang a sawi lang.