EPL club te hlawkna a pung nasa

UK company Deloitte in a tarlan danin English Premier League club te'n tunhnaiah sum an hailut nasa a, kum 15 hnua an hlawk nasat ber ṭum 2013/14 season khan tawngin Premier League club zawng zawngin a hlawkna an tel zat hi pound maktaduai 190 zet a tling a ni.

Premier league club te'n hlawkna an tel zat punna hi a nasa khawp a, kum 1997-98 season-a club 20 hlawkna belhkhawm pound maktaduai 49 chu he record thar hian a rawn khum chiang hle a, a punna zat hi a let li lai a ni.

Deloitte Sports Business Group partner Dan Jones chuan, "Tunhnaia broadcast deal thar vang leh sumdawnna lama Premier League club te an ṭhan nasat avangin sum lut hi a pung nasa a, a punna hi 29% lai niin pound tluklehdingawn 3.3 a ni. Amaherawhchu, sum lut hi heti khawp hian tam mahse player-te hlawhah club an insen nasat avangin an hlawk tur angin an hlawk lo zawk a, playewr-te hlawha an insen zat ringawt hi 6% in a pung a, hei hi a vaiin pound tluklehdingawn 1.9 a ni," a ti.

Dan Jones chuan sawi belhin, "Football club te'n an tum ber chu khelmuala anmahni ṭantute lawmna siamsak hi a ni. Chutiang an tih ruala an sum lakluh in hmasawnna nasa tak a lo nei a nih chuan a lawmawm lehzual a ni," a ti.