Khatla TBL leh final inkarah Tuikual South

Samsung 3:16 Plan Solution Mizoram Super League-ah Khatla TBL an che ṭha filawr a, vawi ruk khelhah vawi ruk an chak. Khatla hian vawiin tlai dar 4:00-a Tuikual South an hneh chuan vawi thum khelh hmabak awm chungin final an lut der ang.

Hawla Indoor Stadium-ah ṭantu ngah pahnih an inkhel dawn a, MSL-ah Tuikual South nge Khatla TBL-in ṭantu ngah zawk tih vawiin tlai hian a hriat ang.

Tuikual S tan Rakesh

Tuikual South-in MSL an khelh theihna kawnga player pawimawh chu feet ruk leh inches riata sang Rakesh a ni. Haryana tlangval hian Tuikual South hi MSL-ah bul a ṭan pui lo a, a tel loin February 20 tlai khan Khatla TBL lakah 61-68 in an tlawm.

Rakesh-a tel loa an inthlauhna hi point sarih lek a ni a, vawiin tlaia mipui mit fukna tur chu Rakesh-a hi a ni.

TBL ṭhatna

Khatla TBL-ah player ṭha an tam a, an result ṭhatna chhan erawh an thiamna anga an khelh chhuah theihna tura coach Mapuia'n player a rem thiam vang te leh team chhung boruak ṭhat vang te a ni.

Ṭha ṭhiau zingah hman rim an awm a, TBL tan Vanlalmuana, Nelson Lalrohlua leh Gospel Lalthawmmawia te an pawimawh ṭhin hle. Dawrpui Vengthar tlangval Vanlalmuana hi point score kawngah a ṭangkai a, tharum ngah Nelson leh che rang Gospel-a te hi defence leh attack-ah team chakna hnar an ni. Sawi hmaih theih miah loh chu Mapuia bawk a ni a, coach leh player ni kawp Saron Veng tlangval hi a hunah tak a rah ṭhin.

Tuikual South an ṭha tawk

BCA leh Tuikual South inhmachhawn hmain BCA coaching staff zinga pakhat chuan Tuikual South bigman Vanchuangpuia chu MSL-a player manto ber a nih a rinthu a sawi. Armed Veng tlangval ChP-a bakah Tuikual South tlangval F. Zodinthara te chu club rinrawl a ni a, Mizoram basketball-a hming langsar pha ve ve an ni.

Tuikual South coach KC-a chuan, "Dina leh ChP-a hi team tan an pawimawh a, game plan pawh anmahni aṭanga kan siam a ngaih phah. Rakesh hian sapṭawng a thiam loh avangin a nih tur ang a la ni pha lo a, chuvangin Dina leh ChP-a te hi an pawimawh a ni," tiin a sawi.

Chak tum TBL

Khatla TBL coach H. Laldinsanga chuan, "Chak kan tum ang. Chu chu kan khelh dan tur ka sawi lawk theih chu a ni. A tirah ka lut nghal dawn em tih leh tunge lut dawn tih hi tuna ka la sawi theih loh chu a ni," a ti.

Mapuia hian BCA an hneh zawhah, "Chhiarkawp dana a chian hma chuan final kan lut chiangah ka ngai lo," tiin a a sawi tawh a, final luh chian vat a duh thu a sawi bawk. Hei vang hian Tuikual South tan hneh loh nei lo hmachhawn hi a harsa khawp ang.

Pressure nei lo Tuikual South

MSL Playoff-a khingpui zawng zawng hnehtu Tuikual South-in MSL-a hneh loh la tawng lo Khatla TBL an hmachhawn dawn a, coach KC Lalliantluanga chuan pressure an neih loh thu a sawi mauh mai.

Tuikual South Pressure neih loh dan erawh a dang. KC-a chuan, "Khatla TBL-in BCA an hneh a, anni hian team dang an hneh vek bawk chuan hlauhthawn tur a awm lo. TBL hi final lut tur pakhat a ni a, hmunruak pakhat kan inchuh ang. Chu­vangin pressure nei loin kan khel dawn lo, kan khelh dan tur chu chak tum si, chak loh pawi ti si loin kan khel ang," tiin a sawi.