Michel Platini-a'n tharum thawhna a chhuah zel a hlau

UEFA president Michel Platini-a'n Eu­rope-ah mipui thunun tu te tel lo chuan inkhelh laiin buaina lian zawk a chhuah chhunzawm zel a hlauhawm thu a sawi.

French pachal Platini chuan, "Khelmualah hnam bil in lak vungna nasa tak a thleng a. Chanchin duhawm lo tak tak chu European stadium chhung­ah a thleng mek," a ti.

March 11 khan Greek Cup quarterfinal-a AEK Athens leh Olympiakos inkhelh ṭumin fans ten khelmualah buaina an siam avangin inkhel tih tawp a ni. Kumin kumtir lam khan Greek Super League-ah buaina a chhuah nasat ṭhin avangin Greek sorkarin League khelh lai chu a ti tawp lailawk tawh bawk.

Hetiang chanchin duhawm loh tak tak hi European football-ah a thlen mek zel avangin UEFA president Platini chuan stadium chungah venhimna leh inkhuah khirhna ṭha zawk awm tir a duh a ni.

Kum 59-a upa Plati­ni chuan, "Football chan­chinah chuan hetiang thil thleng hi a lungchhiat thlak ṭhin a ni. Boruak ṭha tak hnuaia inkhel en hi duhthusam ni mah se tun dinhmunah chuan kan thei rih si lo. Mipui thunun turin 'European sports police force' hi a pawi­mawh hle," tiin a sawi.