Zarkawt Serpents an chak nawn thei dawn em?

Match nga chhung chak result an hlawhchhuah zawh loh hnuah Zarkawt Serpents in an chak hmel hmuh hmasak ber an hmu a, Chaltlang Ryders an hneh. Hawla Indoor Stadium-ah Mission Veng Vikings an hmachhawn leh dawn a, an chak zawn theih dawn leh dawn loh zanin dar 8:00-ah a hriat ang.

Mission Veng Vikings hi an chhe lo. An match hnu­hnung berah Playoff aṭanga MSL inhlangkai Tuikual South an hneh a, Haryana pa sang Rakesh-a leh Chp-a te khelhna team hneh theitu an nih vangin an chhe lo.

Tuikual South mipui au thawm tudaitu, an match hnu­hnung bera points 30 hlawh­chhuaka rebounds 14 nei thei Lalrina Renthlei hi Serpents tan ven uluk ngai tur chu a ni ang.

Zarkawt Serpents manager Dino Laldinpuia Chhangte chuan, "Kan game hnuhnung berah chak result kan neih avangin player-te an phur tlang a, kan game hmasa te ai kha chuan inrintawkna nasa takin kan nei tawh a ni. MSL chinah chuan huphurhawm lo tak tak an awm tawh lo a, mahse theihtawp chhuahin kan khel anga, team game ṭha tak khelhchhuah kan tum ang," a ti.

Mission Veng Vikings BC coach Reuben Lalchhandama chuan, "Tupawh tum dawn ila dah hniam ngawt thei an ni lo. Kan tana pawimawh ber chu kan game hmabak zela chak chhoh hi a ni a, a ṭha thei ang ber zela khelhchhuah zel hi kan duh ber chu a ni mai. Player malah kan innghat lo a, kan player te hi an chet fuh ni chuan team chakpui thei khawpa players ṭha vek an ni," a ti.