Costa a insawi fiah

Chelsea striker Diego Costa chu hliam vangin Spain tan a inkhel thei dawn lo a, nikum October hnulamah ram tan ala inkhelh leh loh avangin mi tam takin ram hmangaih tawk loah an ngai.

Spain in Euro 2016 qualifier-a Ukraine an hmachhawn tur leh Netherlands nen friendly match an khelh hunah Spain tan a inlan ve thei dawn lo a ni.

Costa hian a pianna Brazil aiin Spain tan a khelh a thlang zawk a, kum 2014 February khan Vicente del Bosque chuan a vawikhat nan Spain tan a khel turin a ko a ni. Ram tan hian ṭum sarih a inlan tawh a, hliam a tawrh fo avangin a khel tam tawk lo. Tun ṭumah pawh hliam avangin a inkhelh theih dawn loh avangin sawiselna a dawng nasa hle.

Spain striker Costa chuan, "Spain tan a khelh ka thlan chhan chu Spain tan a ṭha taka khelh ka duh vang a ni. Mipui min sawiselna chhanletna ṭha ber chu ṭha tak a inkhelh leh goal thun a ni mai a, mahse tunah chuan chu chu ka tih theih rih si loh avangin min sawiselna hi ka tawrh rih a ngai a ni. Tunah hian a bul kan ṭan dawn chauh a ni a, theihtawp chhuah chu ka tum," tiin a sawi.