Khawvel champion hmaah Asia champion an duai lo

Fritz Walter Stadion-ah Germany-in Asia champion Australia an mikhual a, World champion Germany hian Arsenal duh loh Lukas Podolski hmangin an draw hram.

Nilaini zan inkhelah Germany manager Joachim Low-a'n hun rei tak inhliam vanga khel thei lo, Holger Badstuber leh Ilkay Gundogan te starting eleven-ah a telh a. Germany hian minute 17-na lekah Marco Reus hmangin goal khung hmasa mah se game hmuhnawm an khel lo a, beisei an pha lo hle.

Australia-in minute 40-naah an phu angin James Troisi tauh luh hmangin an sut a, second half ṭan aṭanga minute ngana lekah captain Mile Jedinak-a'n freekick aṭangin hmahruaina goal a khung.

Germany-in friendly match-ah tlawm an tum lo a, Podolski leh Andre Schurrle te bench aṭanga luh tirin player pahnih hian danglamna an siam. Chelsea player hlui Schurrle pass chu Podolski-a'n minute 81-naah a khung a, 1-1 in inkhel a tawp.

Germany boss Joachim Low chuan, "Kan inkhel kha hmuh a hreawm a ni. First half-ah khan kan khel chhe hran lo a, second half-ah khan kan duh angin kan khel chhuak lo. Pathianniah erawh kan theihna zawng zawngin kan khel tawh ang," a ti.

Euro 2016 qualifier-ah Germany in Pathianni khian Georgia an hmachhawn ang.

Bendtner hattrick

Internet lama player langsar chu Nicklas Bendtner a ni a, fiamthu thawh nana hman ṭhin a ni. Nilaini zana Denmark-in friendly match-a USA 3-2 a an hneh ṭumin hattrick a siam a, an sawi zui nasa. Arsenal player hlui chungchang comment ngaihnawm a tam hle.

USA-in Jozy Altidore leh Aron Johann­sson te hmangin ṭum hnih hmahruai mah se Wolfsburg forward Bendtner hian ṭum hnih a sut bakah chakna goal a khung zui bawk. Inkhelh banah Denmark coach Morten Olsen leh USA boss Jurgen Klinsmann te'n an fak.

Olsenc huan, "Wolfsburg coach Dieter Hecking nen kan inbiaa a, training-naa Bendtner-a thawhrim thu min hrilh. A teammate Dutch forward Bas Dost-a'n inkhelh apianga goal a khung avangin a ṭan a ngai a, a thawrim rah kan seng a ni," a ti.

Klinsmann chuan, "Match khata goal thum khung theih chuan khawvel hmun hrang hranga aṭanga fak an phu a ni. Bendtner hian chawimawi hi a phu a ni," tiin a sawi.

Friendly match results

Indonesia 0 - 1 Cameroon

Swaziland 1 - 3 South Africa

Nigeria 0 - 1 Uganda

Denmark 3 - 2 United States

Germany 2 - 2 Australia

Scotland 1 - 0 Northern Ireland

Georgia 2 - 0 Malta

Dominican

Republic 0 - 3 Cuba

Mauritius 2 - 2 Burundi

Gabon 4 - 3 Mali

Bahamas 0 - 5 Bermuda

Belize 0 - 0 Cayman Islands