Red Bull Chief an chhuahchhal

Renault managing director Cyril Abiteboul chuan Red Bull chief technical officer Adrian Newey hian dawt a sawi a ni a ti. Newey hian kumin Formula one intlansiak hmasaber Australia-a an team chet ṭhat loh chhan chu an engine ṭhat tawk loh vang tiin a lo sawi tawh a ni.

Tunhnai kum li chhung, 2010 aṭanga 2013 chhung khan Reb Bull team hia an cheṭha hle a, a zawnin ṭum li lai constructor champion an ni. Mahse nikum aṭang khan tluk loh an nei a chu chu Mercedes driver Lewis Hamilton a ni. Kuminah pawh Mercedes hi an tluk leh dawn loa a hriat vang a ni ngei ang Newey chuan an chet ṭhat loh chhanah an engine a puh nghal der tawh. Hei hi Red Bull car engine siamtu Renault lam chuan an duh lo hle.

Red Bull technical boss Newey chuan, "Kan engine hman lai hi midangte el pha turin a hlui lutuk tawh a ni," tiin an engine hman lai a lo sawisel tawh.

A thusawi hi Renault engine chief Abiteboul chuan chhangin, "Dawt sawi ching thawhpui neih hi a harsa hle a ni. Andrian hi chairman leh engineer a ni kawp a, mahse engtiklai pawh in a thawhpui te hi engine chungchangah min sawisel reng a ni." a ti ve thung.

Abiteboul chuan sawi chhun zawmin, "Kan harsatna belhchhah turin Red Bull hian car chassis-ah leh a hnung lamah hian felhlel a awm a, chuvang zawk chuan car khalh a harsa zawk a ni," a ti.

Pathianni hian Malay­sian grand prix an tlan leh dawn a, hetah hian Red Bull chuan hmasawn an tum hle. Australia-ah khan Mercedes leh Ferrari an el pha lo hle a, an driver Daniel Ricciar­do chu paruknaah thlengin Daniil Kvyat chu 16-naah daih a thleng a ni.

Formula one chief writer Andrew Benson chuan, "Red Bull leh an car engine siamtu Renault inkar hi a ṭha lo rih hle a ni. He hi tunhnai kum li chung intlansiak kan thlir let chuan thil mak tak a ni. A lehlam ve ve hian thiam na lai leh thiam lohna lai an nei ve ve ang. Mercedes leh Ferrari te an elphak loh avangin Red Bull lam tan chuan lungawi a har hle ang. Mahse Renalut lam pawhin an thiam leh theihna sang ber an hmang ngei ang tih chu a chiang reng," tiin a sawi ve bawk.