I League 3-ah Chanmari FC-in chakin bul an ṭan
Chanmari FC-in I League 3-ah bul an ṭan ṭha a, September 3, Thawhlehni zan khan Coramandal FC chu 3-1 in an hneh. Mizo club tan hian Lalkhawpuimawia, Joseph Lalvenhima leh John Lalrempuia Sailo ten goal khat ṭheuh an khung a, Coramandal tan Singte George Kom-a'n a khung ve bawk.
Vawiin hian I League 3 hi RG Stadium-ah khelh chhunzawm ni dawn mah se Mizo club an inlan dawn lo. HAL-in chawhnu dar 2:00-ah Mighty Young Joe-Goalorious Mothers Sports Club an hmachhawn dawn a, Mumbai club MYJ-GMSC hi an vawi khat inlanna tur an ni. Zanin dar 7:00-ah point la hmu lo RKM Football Academy leh Coramandal FC te an inkhel bawk ang.
Bul ṭan ṭha CFC
Chanmari FC-in minute hnihna lekah penalty an hlawh chhuak. Baktawng tlangval Vincent Lalduhawma cross chu Kuman Ronaldo Singh-a'n pet chhuah tumin a ban a pet per a, referee-in penalty a pe. Mapuia rawn pen chhuakin awlsam hmel takin a khung a, boruak sangah Kelkang forward a buai lo.
Coramandal FC an insiamrem thei lo a, tlarhnung an chesual nawn. Tlarhnung bera awm Karam Ricky Singh-a'n an lamah ball a pet pial a, Vincent-a'n um lutin mahni hmasial lo takin Joseph-a a pe a, Lunglei tlangval hian minute 11-naah awlsam takin goal ruakah a khung.
Chanmari FC-in bul an ṭan ṭha a, first half-ah inkhel thununtu an ni. Chhum zingin inkhel tibuai mah se Mizo club-in goal hnih an khung hma zarah nuam sain an khelh theih phah. Mahse, first half tawp lamah Chanmari tlarhnung an fimkhur tawk lo a, Coramandal FC-in an chance ṭha neih an khung loh hnuah Singte George Kom-a'n injury time-ah mawi zetin a pet goal.
Andhra Pradesh-in first half-a si phurh sut ṭhen vangin beiseina thar nei mah se second half-ah Lalsangzuala Hmar te bawk an chungnung. Ephraim Lalremtluanga'n freekick aṭangin cross bar a pet per a, Mapuia, Moses Lalrinzuala leh Lalrokima ten goal khung theihna chance ṭha an hlah.
Chanmari an vanduai reng lo a, minute 85-naah Rokima ball pek chu box pawn aṭangin substitute John-a'n goal kilah tak a hlai lut a, goalkeeper Surya Teja a rep nalh hle. Lalsangzuala Hmar hoten point thum hlu tak an hmu a, round hnihna an awl bawk avangin an la hmachhawn lohte zirchianna hun ṭha an nei thei ang.
A hot chho dawn
I League 3 group stage-ah hian group khat aṭangin team pahnih zelin final round an lut dawn. Group C-ah inelna ṭan hmaa team ṭha tura ngaih HAL leh Chanmari FC ten hnehna an chang. Team pahnih elpui leh thei tura ngaih chu vawiin aṭanga inlan tur GMSC hi an ni.
Mumbai club GMSC leh HAL inkhel aṭang hian group C dinhmun tur a hriatthiam theih ang. HAL-in an match hmasa berah team ṭha an ni tih an lantir a, chutihrualin GMSC-in an hneh erawh chuan Chanmari tan pawh final round kalkawng a bumboh sawt ang.
Chanmari FC-in sum ṭhahnem tak sengin I League 3 an khel a, RG Stadium-ah football ṭha an chhawp chhuak. Mizo club-in Mizo mipui ṭawiawmna an mamawh a, tualchhung football hmasawn nan Chanmari hian tha an thawh hlawk avangin ṭawiawmna ṭha dawn pawh an phu hle.