US Open semifinal-ah Aryna Sabalenka a lut

Tennis inelna lian US Open khelh laia hmeichhe inelna huangah Aryna Sabalenka chuan semifinal a lut. Sabalenka hian Zheng Qinwen hnehin quarterfinal a paltlang a, a match lehpekah chuan Emma Navarro a hmachhawn leh ang.

Nimin zing inkhelah Sabalenka hian harsatna lian tham a tawk lo, darkar khat leh minute 13 chhung lekin seeded pasarihna Qinwen hi 6-1, 6-2 in a hneh a, tun hmaia khel ṭha leh Olympic champion hial ni thei a paltlang awlsam hle.

Belarusian nula Sabalenka hian season hmasa khan US Open final a lo lut tawh, mahse nomawi inchuhna inkhelah Coco Gauff a ngam lo, inkhel hmuhnawm takah a vanduai zawk a ni.

Tun season tir lam khan Australian Open nomawi a chawi a, inrintawkna a neih dan belh nasa hle - tun ṭumah pawh hian rinkai berte zinga mi niin, match nga a khelh tawhah set khat chiah a la hloh.

Kum 26 mi Sabalenka hi tun ṭumah hian rinkai bik a ni a, world number 1 Iga Swiatek la dam tho mah se hard court bikah chuan Sabalenka hi a chet ṭhat ṭhin avangin a buk a rit, a khingpui leh tur Emma Navarro tan pawh fimkhur a ngai dawn.

Quarterfinal inkhel dangah American nula Navarro hian Badosa chu 6-2, 7-5 in a lo hneh ve thung, set hnihna bikah hian 5-1 ngawtin hnufual mah se game hnuhnung paruk ngawt la zawnin a chak tlang a ni.

Kumin June thla khan Sabalenka leh Navarro te hi Franch Open fourth round-ah an lo inhmachhawn tawh, hemi ṭum hian game nga chauh hlauh chungin Sabalenka a chak. Indian Wells-a an intawn ṭum erawhin Navarro a chak thung.

US Open hmeichhe inelna hi tukina quarterfinal khelh zawh a ni ang, number 1 Swiatek leh seeded parukna Jessica Pegula te an intawng, tun kar tawpah tournament hmawrbawkna neih tur a ni.