Fritz lakah Zverev a chak lo

Alexander Zverev leh Grand Slam Title hi chu kawp tura duan an ni rih lo, hrang tura duan an ni - German star hi Taylor Fritz lakah 7-6(2), 3-6, 6-4, 7-6(3) a chak loin US Open quarterfinal aṭangin a tla.

Arthur Ashe Stadium-a hnehna changtu Fritz hian semifinal-ah chuan Frances Tiafoe a hmachhawn leh dawn - American tlangval pahnihten final luh an inchuh dawn a ni a, tualchhung mite chuan an ngaihlu hle ang.

American tlangval zingah Andy Roddick kha Grand Slam title la thei hnuhnung ber (2003) a ni a, hemi ṭum hian US Open nomawi a chawi, kum 2006 khan final a lut bawk, ani hnuah hian final lut thei an la awm leh lo.

Nimin zing quarterfinal inkhel dangah Tiafoe hian Grigor Dimitrov chu 6-3, 6-7 (5-7), 6-3, 4-1 in a lo hneh ve bawk a, tualchhung player pakhat zawk chuan semifinal a thleng ngei dawn tih a chiang tawh a ni.

Zverev a tla

Tun hnai thla hnih chhung mai a la ni - Taylor Fritz hian ṭum hnih ngawt mai Alexander Zverev hi a hneh hman. US Open bakah hian Wimbledon fourth round aṭang khan a lo vaw tla tawh bawk.

Olympic leh ATP Masters 1000 champion ni tawh, a thiam zual pariat inelna ATP Finals champion ni tawh bawk Zverev hian major title a la nei lo chhunzawm dawn tihna a ni a, a mutan ber hi a paltlang thei rih ngang lo.

Seeded palina Zverev chuan, "A tawi leh awlsam zawnga sawi dawn chuan, ka khelh danah khan chak ka phu lo a ni. Taylor khan a khel ṭhain chak a phu em em a, sawi chhunzawm theih pawh ka nei lo," tiin a sawi.

Zverev hian ball a vaw na ṭhin, a bik takin a backhand ṭha chu a chakna hnar pawimawh a ni ṭhin. Mahse, tun ṭum match bikah erawh chuan backhand aṭanga point a vuak chhuah aiin a tihsual vanga point a hloh a tam zawk.

Kum 27 mi Zverev chuan, "Inrintawkna ka neih tawhsa te kha ka hloh vek a, engtiangin nge khatianga ka awm theih mai kha mak pawh ka ti. Backhand a dik hleithei lo a, forehand chauh chuan min chhan zo lo a ni," tiin a sawi.

Tiafoe a tlang

World ranking en chuan Tiafoe hi rinkai zawk a ni lo, mahse inkhel hi chu result sawi lawk ngawt theih hi a ni ṭhin lo - player pahnih an inkhel tawk viau a, set lina an khelh laiin Dimitrov hi malpui hliam vangin a inhnukdawk.

Tiafoe-a'n tun hmain New York khawpuia hian semifinal a lo lut tawh, mipui lam aṭanga thlawpna a dawn ṭhat ṭhin em avangin a tan hmun nuam a ni a, final luh beiseina pawh a nei sang chho dawn hle a ni.

Kum 2005 hnu lamah Amercian tlangval pahnihten Grand Slam semifinal-a an intawn lehna hmasa tur a ni a, tennis ngaina ram ropui ni mah se player ropui bik an neih lohna a rei ta hle tih a chiang, an pahnih hian major tournament bikah final an la lut ngai lo.

Seeded 20-na Tiafoe chuan, "Ka chak dan hi duhthusam a ni lo, a chhan chu ka khingpuiin hliam a tuar a, match pangngai kan khel zawh thei loh avangin a hrehawm pawh ka ti hle, ka tlang avang erawh chuan ka lawm," tiin a sawi.

Chak lo Dimitrov erawh a vanduai - grass court inelna lian Wimbledon an khelh ṭum khan khup hliam vangin a buai tawh a, tun season atana Grand Slam hnuhnung ber US Open pawh hliam vang bawkin a khel tluan thei ta lo a ni.