Ramhlunin hun ṭha bawhpelh

LZ Juice MPL11-ah Ramhlun Athletic-in Sihphir Venghlun lakah goal hnihin hma hruai tawh mah se an hum zo lo. Ramhlun tana Benjamin Lalnunpuia goal hnih khung a tawk zo lo a, Sihphir Venghlunin Lalawmpuia leh Seilenlal Mate te hmangin an sut a, a, 2-2 in inkhel a tawp.

Nimina RG Stadium-a inkhelah Ramhlunin bul an ṭan ṭha a, Benjamin Lalnunpuia goal hmaah a hriam hle. Minute 19-naah Ramhlun forward Bena hian angle zim tak aṭangin goal kilah tak a pet lut a, Sihphir Venghlun keeper Lalhruaizela'n a dang thei lo.

Second half ṭantirhah pawh Bena bawkin goal a khung. Minute 48-naah Felix Lalruatsanga'n box chhungah inrintawkna nen ball a khawih a, Serchhip tlangval Felix hian Bena tan siamsakin Vaivakawn tlangval hian kawh zetin a pet goal.

Sihphir Venghlunin tlawm an tum lo a, I Day Football-ah Ramhlun lakah an 'comeback' tawh. Nimin inkhelah pawh an goal bawh a nat avangin Ramhlun tlarhnung an talbuai a, goalkeeper C. Vanlalhriata hun rei zawk che ṭha mah se hun tawp lamah a chesual.

Coach Robert Laldinthara hoten set piece an hmang ṭha a, minute 81-naah AwP-a'n box chhung buai deuh nuaih karah siphurh a sut ṭhen. Injury time-ah keeper Hriata'n freekick a man per avangin Sihphir Venghlun tan Seilenlal Mate-a'n siphurh a sut zo. Sihphir Venghlun hian chakna goal khung theihna pawh an nei a, mahse keeper Hriata'n a tihtur rawn ti tawhin 2-2 in an inhnehtawk.

Sihphir Venghlun hian an intawn hmasak zawkah Ramhlun hi an hneh tawh a, tun ṭuma point khat hlu tak an sual chhuah avangin head to head-ah an ṭha zawk. Chutihrualin point 10 hmu hi team pathum Mizoram Police, Ramhlun leh Sihphir Venghlun te an awm a, head to head en a rem rih loh avangin goal difference nei chhe ber Sihphir Venghlun hi panganaah an tla thla.