India-in Mauritius lakah goal khung lo

Manolo Márquez hnuaia an match hmasa berah India an chak zo lo nghal a, Thawhlehni zan khan Intercontinental Cup-ah FIFA ranking-a 179-na Mauritius chu 0-0 in an inhnehtawkpui - hmabakah Syria an la awm a, Blue Tigers tan a harsa ṭalh tawh ang.

Igor Stimac hmun ruak luah tura lak Manolo chuan, "Tun aia khelh chhiat zawk hi chu a harsa ang," a ti hial a, a naute khelh dana a lawm loh thu a sawi. September 9, Thawhṭanni zanah India hian Syria an hmachhawn leh dawn.

GMC Balayogi Athletic Stadium, Hyderbad-a inkhelah India tan Mumbai City captain atana ruat hlim Lallianzuala Chhangte chuan ṭum dang ang bawkin bul a ṭan a, Mumbai aṭanga Mohun Bagan pantu Lalengmawia Ralte (Apuia) pawh midfield-ah bul a ṭan.

Hetihlai hian India squad-a a vawi khat nana awm K. Lalṭhathanga (Puitea) chu bench lamah a awm tluan a, Odisha FC midfielder hian khelmual lut lo mah se, ram tana koh a nih vawi khatna a nih avangin a tan international break chhinchhiah tlak a ni.

A hmuhnawm lo

ISL-a FC Goa coach ni bawk Manolo-a'n awmze neia a naute khelhtir a tum a, tlarhmaah Sunil Chhetri a awm tawh loh avangin Manvir Singh a mal tlat tir a, a sir aṭanga LZa leh Liston Colaco ten thlawpin, a hnung chiahah Anirudh Thapa a awm.

Mahse, Manolo-a'n Stimac-a khelhtir ṭhin dan aṭanga player a siksawi nual chungin a duh ang game an khel chhuak thei lo a, inkhel a hmuhnawm lo - Blue Tigers hian minute 90 chhungin vawi khat chiah target-ah shot an nei a, mahse, Manvir-a'n goal-ah a chantir thei lo.

Mauritius-in tlarhnung venhim thupui berah an neih avangin India-in an su tlang zo meuh lo a, centre back Lindsay Rose chu man of the match atan thlan a ni - kum 32 mi defender hi Greek Super League club Aris tana khel lai a ni a, Ligue 1 club Lyon tan pawh a khel tawh.

Mual ding lam sir aṭangin LZa'n thawm nei ṭhin mah se, an mamawh ber goal a thawk chhuak thei bik lo a, a cross ṭha tak Kevin Jean-Louis-a'n a lo dan hmante chu uiawm tak a ni.

Beiseina

Coach thar hnuaiah India an chak zo lo a, mahse, Blue Tigers forward Lianzuala'n beiseina an neih san thu a sawi. Lunglei tlangval chuan, "A zia dawn viauin ka hria. Kan thiltih engkim ruahmanna awm sa thlapin kan ti a, inbuatsaihna hun kan neih tam loh ngaihtuah chuan kan khel pangngai viau bawk.

"Ka duhdan tak erawhin kan nawr tam tawk lo a, hei hi hmasawn kan ngaihna lai chu a ni," tiin Vanglaini a hrilh a, African ram Mauritius-in defensive game khel mah se, an nawr nat tur anga an nawr nat tawk loh thu a sawi.

LZa chuan sawi chhun-zawmin, "Syria kan la hmachhawn leh dawn a, hma kan sawn ngei ang a, tun aia ṭha zawka rawn khelhchhuah kan tum ang," a ti a, coach thar chungchangah "Match khat chauh kan la khel a, a la hriat zel ang chu," tiin Vanglaini a hrilh bawk.

Kum 55 mi Manolo hian 2020 khan ISL club Hyderabad zawmin, a season hnihnaah club budget tam lo tak hi ISL nomawi a chawipui. Hetihlaia Hyderabad neitu Varun Tripuraneni chuan, "Coach thawkrim tak a ni," tiin Vanglaini a lo hrilh tawh.

"Kan chau hle - pre-season chauh a la ni a, kan la train tam tawk lo tih a lang chiang. Ka player-te inpekna leh goal kan chhuah loh dan thlir chuan game ṭha tak a ni a, hma kan sawn zel ang. Media ka hmachhawn hmasak berah khan, Asian Cup qualifier atana inpuahchah ka duh thu ka sawi a, chutiang tur chuan theihtawp kan chhuah a ngai - kil tinah hmasawn kan ngai a, kan ti ngei ang tih pawh ka ring."

- Manolo Marquez, India coach