CFC = AFC; A chung berah Chanmari

Chanmari FC-in hahdamna hun ṭha an nei lo chungin LZ Juice MPL11-ah Aizawl FC nen 1-1 in an inhnehtawk a, Lalsangzuala Hmar hote hian I League club laka point an hlawhchhuah theih avangin pakhatnaah an awm chhunzawm.

Nimin tlai inkhelah Chanmari FC tan Moses Lalrinzuala'n first half-ah goal a khung a, second half-ah Aizawl FC tan Laltlanzova'n si phurh sutin chak zawk an awm lo. Tun season MPL-ah league champion hnenah nomawi pek a ni dawn a, I League club tan pakhatna ni turin Chanmari chetsual an nghah a ngai tawh.

Chau leh chau lo

Chanmari FC-in Thawhlehni zanah I League 3 an khel a, inkhelh zawh aṭanga darkar 15 velah Aizawl FC an hmachhawn lehnghal. Lalsangzuala Hmar hote tan hahchawlhna hun a awm lo.

Sanga hian Coramandal FC hnehtute aṭangin Joseph Lalvenhima chauh bul a ṭan nawntir a, player 10 ngawt a thlak. Chutihrualin Chanmari squad ṭhatna a lang a, bench aṭanga lut zinga MPL-a tawnhriat nei tlem pawh I League 3-a goal khung zo hlim John Lalrempuia Sailo a ni.

Aizawl FC erawhin tun ṭuma an inkhelh tur atan hian ni li chhung inpuahchahna hun an nei a, point thum hlut pawimawhzia an hria. Bul ṭantu zingah playmaker ṭha Samuel Lalmuanpuia a tel a, goal khung tam pathum C. Lalhriatpuia, Lalbiakdika leh Augustine Lalrochana ten bul an ṭan vek.

Moses leh Zozoa

Aizawl FC-in chak ngei tum mah se Chanmari an insiamrem rang zawk a, Sanga hoten bul a ṭan ṭha zawk a, zan lama match pawimawh hmachhawn tih an hriat loh.

Chanmariin an chet ran rah an seng a, minute 17-naah Moses-a'n box pawnah ball tauh chhuah changin kawh zetin a pet goal. AFC goalkeeper Joel B. Lalramchhana tan dan ngaihna a awm lo. Khatla East tlangval Moses hian goal dang khung belh thei mah se hun ṭha a hlah.

Aizawl FC-in si phurh sut tumin an nawr a, mah se goalkeeper RS Lawmzuala a che ṭha. Chanmari keeper hian Samuel-a freekick ṭha zetin a dansak a, second half-ah pawh save ṭha nei chhunzawm zelin man of the match-ah an thlang.

Chutihrualin goalkeeper RS-a hian second half ṭan chiaha Zozoa goal khung tur erawh a dang thei lo a, Champhai Kanan tlangval hian a club hlui lamah Aizawl FC tana goal pawimawh a khung zarah 1-1 in inkhel a tawp. Chanmariin point hnihin hma an hruai chhunzawm a, chutihrualin I League 3 leh MPL an khelh kawp avangin MPL11-a pakhatna ni chunga league round khar a harsa dawn.