England: Foden, Palmer leh Watkins an inhnukdawk

UEFA Nations League khel tur England squad a pan zel a, a tira koh aṭangin player langsar Phil Foden, Cole Palmer leh Ollie Watkins te chu squad aṭangin an inhnukdawk leh ta a, an aiawh tur koh tumna a awm lo.

International break hman mek a ni a, September 7, Inrinni zan dar 9:30-ah Three Lions hian Republic of Ireland chu match hmasa zawk khel turin an lenchilh ang a, Finland an hmachhawn leh ang.

September 11, Nilaini zanah Wembley Stadium-ah Finland hi an hmachhawn dawn thung a, coach lailawk Lee Carsley hoin England hi an inlan dawn - Carsley-a'n hna nghet beiseiin result ṭha neih a tum ang.

England hi coach Gareth Southgate chuan Euro 2024 zawh khan a bansan a, English coach thlaktu tur an zawn hmuh lawk rih loh avangin England Under-21 coach Lee Carsley hian a kaihruai rih dawn.

Foden a dam lo

Manchester City forward Foden hian dam lohna avangin tun season-ah minute 45 chiah khelmualah hun a la hmang a, Lee Carsley-a'n a koh tirh pawh khan coach Pep Guardiola chuan a player hian squad a zawm theih a rin loh thu a lo sawi tawh.

Mahse, fans ṭhenkhatin Foden hi dam hman turah an beisei a, an beisei ang erawhin a thleng ta lo. PFA Player of the Year-a thlan hlim hian Three Lions jersey hain khelmual a lut thei dawn lo a, a inhnukdawk.

Football Association chuan thuchhuah siamin, "Dam lohna avangin Foden-a'n squad a zawm thei dawn lo a, Republic of Ireland leh Finland hmachhawn tur zingah a tel thei lo," an ti a, team lian an hmachhawn dawn loh avangin harsatna liantham erawh a awm phah lo tura ngaih a ni.

Kum 24 mi Foden hian England tan match 41 khel tawhin, goal li a khung tawh a, Euro 2024 khelh zawh takah khan an match zawng zawngah bul a ṭan vek - final-ah Spain an ngam lo.

Palmer & Watkins

Euro khelh zawh takah Palmer leh Watkins ten England jersey an ha a, mahse, bul an ṭan phak lo. Coach lailawk Carsley-a'n international break neih leh hmasak berah a ko zui a, mahse, hliam vangin an kir.

FA chuan, "Thawhlehni khan England squad chu koh khawm an ni a, mahse, an dinhmunte chiang taka en a nih hnuah Carsley leh Foden chu an inenkawlna chhunzawm turin kirtir an ni," an ti a, player pahnih hi international break-ah kan hmu dawn lo.

Kum 22 mi Palmer hian England tan match kua khelin goal hnih a khung tawh a, a goal hnuhnung zawk hi Euro 2024 final-a Spain laka a khung kha a ni - mahse, a team nomawi chawi nan erawh a tling tawk lo.

Watkins-a'n England tan match 15 khelin goal li a khung tawh a, Three Lions tana a goal khung hnuhnung ber chuan Euro 2024 final-ah England a hruai kai hial. Mahse, Harry Kane a awm miau avangin England-in an ngai lutuk lo ang.

A vawi khatna

Lee Carsley-a'n ram tana la inlan ngai lo player pali ngawt a ko a, Angel Gomes, Tino Livramento, Morgan Gibbs-White leh Noni Madueke te an ni - anni hi England U21-ah Carsley kaihhruaiin an lo khel vek tawh.

Lille midfielder Gomes hi Manchester United chhuak niin, 2020 aṭang khan French club tan hian a khel a, kum 21 mi full back Livramento hi Newcastle United tana khel a ni.

Kum 24 mi Morgan Gibbs-White hi Nottingham Forest attacking midfielder niin, tun season-a league match thum khelhah goal khat a khung tawh a, Chelsea tan Madueke a vul mek.

Dutch club PSV Eindhoven aṭang teh daiha hming chher Madueke hian tun season-ah match li khelin goal li a khung tawh a, Wolverhampton Wanderers lakah hattrick a siam hial. A pu hluiin a hnathawh ṭhat a hmu a, ram tana inlan turin a ko.

Kir lehte

Euro 2024-a England tana koh loh Manchester City playmaker Jack Grealish leh Manchester United defender Harry Maguire te chu squad-ah koh an ni leh ta a, Maguire hi hliam vanga Euro-a kal lo a nih laiin Grealish erawh thlauh thlak ve hrim hrim a ni thung.

Grealish hi Carsley hian squad-a telh ve hrim hrim a duh niin a lang a, Euro-a koh a nih loh hnuah a la che ropui rih lo - league match thum an khelh tawhah vawi hnih a inlan a, goal emaw assist emaw a nei lo.

Kum 28 mi winger hian match khatah bul a ṭan a, vawi khat bench aṭanga luhtir a ni a, bul a ṭan zawkah pawh hian lakchhuah a ni tho - minute ang zawng chuan minute 91 chiah khelmualah hun a la hmang rih.

Maguire hian tun season-ah United tan match li a khel tawh a, ani pawh heng match liah te hian khelh tluan a nei bik lo - Carsley hian Marc Guehi leh John Stones a inkawptir ang nge, Maguire hi bul a ṭantir ang, tih chu hriat a châkawm tawh hle.

England Squad

Goalkeepers: Dean Henderson (Crystal Palace), Jordan Pickford (Everton), Nick Pope (Newcastle United)

Defenders: Marc Guehi (Crystal Palace), Ezri Konsa (Aston Villa), John Stones (Manchester City), Trent Alexander-Arnold (Liverpool), Levi Colwill (Chelsea), Rico Lewis (Manchester City), Tino Livramento (Newcastle), Harry Maguire (Manchester United)

Midfielders: Conor Gallagher (Atletico Madrid), Kobbie Mainoo (Manchester United), Declan Rice (Arsenal), Morgan Gibbs-White (Nottingham Forest), Angel Gomes (Lille)

Forwards: Jarrod Bowen (West Ham), Eberechi Eze (Crystal Palace), Jack Grealish (Manchester City), Anthony Gordon (Newcastle United), Harry Kane (Bayern Munich), Noni Madueke (Chelsea) Bukayo Saka (Arsenal).