Steve Bruce a lo kir leh ta

October 2022 hnua club enkawl a neih loh reng hnuin Steve Bruce chu club enkawl turin a lo kir leh ta a, tun ṭum erawh English third division lamah a ni dawn thung - Premier League club hlui Blackpool a enkawl ang.

Kum 63 mi coach hian League One club-ah hian kum hnih cham turin contract a ziak a, league match hnih a zawna an tlawm nghal avanga ban tak Neil Critchley hmun ruak a luah dawn a ni. Critchley an ban hnu hian league match hnih an khel leh tawh a, an la draw ve ve.

Player a nih laia Manchester United tana khel ṭhin Bruce hian coaching khawvelah tawnhriat a nei ṭha tawh hle - Sheffield United aṭanga bul ṭanin, Huddersfield Town, Wigan Athletic, Crystal Palace, Birmingham City, Sunderland, Hull City, Aston Villa, Sheffield Wednesday, Newcastle United leh West Bromwich Albion a lo enkawl tawh.

West Brom hian October 2022 khan a hna aṭangin an ban a, club enkawl a neih loh reng hnuah Blackpool a enkawl leh dawn ta. English coach chuan, "Football-a ka lo kir leh thei ta hi ka lawm a, he club ropui tak ka enkawl thei tur hi ka hlim khawp mai," a ti.

Blackpool neitu Simon Sadler chuan, "Steve-a tawnhriat leh hruaitu ṭha a nihna hi kan club tan a hlu hle ang tih ka ring," a ti a, English coach hoa hma an sawn theih a beisei.