Player langsar ni si club nei lo an tam!
Football nipui bazar a zo a, khawvel ram hrang hranga club lian ten an squad ti chak thei tur player an lei nasa - sum sum tak an seng a, club ṭhenkhat chuan midang duhlai chhuhsakin ṭhenkhat erawh duh reng vanga insiamrem te an ni thung.
European player zingah pawh club nei lo a awm, sulhnu ropui leh ṭha tak tak nei tawh zingah pawh tun thlenga club khelhna tur la nei lo, man nei loa lakluh mai theih an awm nual - an hlawh erawh pek a ngai thung dawn a ni.
Goalkeeper - Keylor Navas:
Keylor Navas hian May thla khan Paris Saint Germain a chhuahsan a, Italian club Monza nen inbia in a lut ngei dawn ni pawhin a lang hman, mahse inremna an nei thei leh ta lo - Costa Rica goalkeeper Navas hi kum 37 mi niin Real Madrid tan pawh a khel tawh a, tawnhriat a nei ṭha tawh hle.
Right-back - Serge Aurier
Tottenham leh Nottingham Forest defender hlui Serge Aurier hian Wilfried Zaha angin Galatasaray a zawm a, kum 31 mi hian tun nipui bazar lai khan Turkish club hi chhuahsanin tun thlengin khelhna nghet a nei leh ta rih lo.
Centre-back - Joel Matip
Kum 33 mi Joel Matip hian season riat ngawm a chamchilh hnuah Liverpool a chhuahsan a, kum 33 mi ni tawhin inkhelh la chawlhsan lo mah se club a nei rih lo - West Ham nen sawizawm ni mah se Premier League leh Champions League nomawi chawi tawh hian a zawn leh ta rih lo a ni.
Centre-back - Mats Hummels
Germany tana World Cup la tawhtu Mats Hummels hian kumin June thla mai kha chuan Borussia Dortmund jersey ha chungin Champions League final a la khel a, mahse Real Madrid lakah an chak lo - tun chuan club nghet nei loin a awm. AS Roma nen sawizawm ni mah se nimin tlai thleng kha chuan Serie A lam a pan leh ta rih lo.
Left-back - Brandon Williams
Brandon Williams hi kum 24 mi chauh a la ni a, kum kua lek a nih lai a Manchester United zawmtu hian Old Trafford-a a cham chhungin match 51 a khel a, chhuah zalen niin club nei loin a awm mek.
Winger - Victor Moses
Victor Moses hian Premier League club panga tan a khel tawh, heng zingah hian Chelsea leh Liverpool pawh an tel. Kum 33 mi niin nipui lai khan Spartak Moscow a chhuahsan a, club zawm mai nei loin a awm rih a ni.
Central midfield - Adrien Rabiot
European Championship 2024 khelh lai khanh France tan player pawimawh a ni phak a, kum 29 mi chauh a la nih bawk avangin Adrien Rabiot tan club a vang lo mai thei. Mahse, Juventus a chhuahsan hnuah Manchester United nen sawi zawm ni mah se club zawm ngheh a nei ta lo.
Central midfield - Andre Gomes
Kum 2019 mai kahn Everton chuan Andre Gomes lei nan pound maktaduai 22 an seng a, 2023-24 season tawp rual khan a contract zoin club a chhuahsan, tuah chuan Barcelona, Valencia leh Lille player hlui hian club khelhna tur a nei lo.
Winger - Robert Skov
Kum 28 mi Robert Skov hi player beisei awm tak a ni ṭhin - Denmark tan 2022 World Cup pawh kha a khel phak. Hoffenheim tan season nga hun a hmang hman a, Bundesliga match 100 chuang khelin goal 11 a khungsak, a contract hmang zoa a chhuah hnuah club thar a la nei leh lo.
Forward - Anthony Martial
Manchester United chuan May thla khan an tana match 317 khelh aṭanga goal 90 khungtu Anthony Martial a chhuah tur thu an puang a, French striker hi kum 28 mi chauh la ni mah se tun thlengin uluk taka dawrtu a la nei lo nia sawi a ni - Ligue 1 club Lille nena sawizawmtu an awm bawk.
Forward - Memphis Depay
Memphis Depay hian Euro 2024-ah khan an ram Netherlands chu semifinal hial a thlenpui, mahse tunah chuan kum 30 mi forward hi club nei loin a awm mek. Manchester United leh Barcelona tan pawha khel tawh Depay hian season hmasa khan Atletico Madrid tan La Liga match 23 khelin goal nga a khungsak a ni.