India chak lo nghawng a nâ
World Champion lai ni mah se World Cup hmaa an chet chhiat vangin mipui beiseina a sang lo. Mahse, World Cup an khel a, India cricketer te'n an theihna tilangin anmahni sawiseltu tekhelmualah an chhanglet. Group stage-ah match sarih khelin an chak fai vek a, champion tura beisei zinga mi South Africa hial pawh an sawp.
Engtiklai pawha an hmelma kumhlun Pakistan chu an game hmasa berah an hneh bawk avangin India cricket team in fak an hlawh.
Quarter final-ah pawh India in harsatna an tawk lo a, semi-final lut turin awlsam takin Bangladesh an hneh. Fans an phur a, semi-final-a ticket 70% lai chu India fan te lei a ni!
Semi-final a an tum tur erawh Australia an ni a, an inkhelhna tur Sydney Cricket Ground a ni. He khelmual hi Indian player te'n tunhma aṭangin an lo ngeih lo tawh a, vawi 13 an inkhelh tawhah vawikhat chiah he khelmualah hian chak hmel an la hmu. Mahse, India bowler te'n match 7 an khelhah wicket 70 an lak theih bakah batsman te an in chet ṭhat chhawk vangin mipui in beiseina sang tak nen semi-final an thlir.
Semi-final an khel a, India bowler te'n beisei an phak lo a,batsman te'n fans an ti beidawng. Run 95 in India an tlawm a, mipui tluklehdingawn khat aia tam chenna India ram a reh a, tam takin India team an sawichhiat bawng bawng lai leh an lim te hial an hal laiin mahni 'lei' lo tan phah tawk an awm a, a tam zawk erawhin India khelh dana an lawm tawk thu an tlangaupui a, India team an fak.