Cricketer hluite ngaihdan

India captain te pawh lo ni tawh ṭhin, a rinawm em vanga 'The Wall' ti a hminglem an phuahsak Rahul Dravid chuan, "Ka ngaihdan chuan team ṭha ber pahnihin final an khel dawn a n. Australia leh New Zealand captain te hi tun World Cup-a captain ṭha ber ve ve an ni a, team inkhairual ber pahnih an ni," a ti.

'Prince of Kolkata' tia hminglem an vuah, India captain hlui tho Saurav Ganguly chuan, "Team ṭha zawkin hnehna an chang a ni. Australia khan ṭhumvawr a vanneihna an chang kha an vanneih pui a, target sang tak um tur an vawchhuak leh bawk nen India tan khati zat run umpha tur chuan boruak kha a sang tawh mah mah a ni. Kan bat hmasa lo kha kan vanduai phah a, India bowler te aia Australian bowler te an ṭhat zawkna kha kan chak loh chhan a ni pakhat bawk," a ti.

Australian spin legend Shane Warne chuan, "Beisei aia Rohit Sharma leh Shikhar Dhawan te an out hma kha India in an tuar a ni. An ni pahnihah khan a tu emaw zawk zawk khan century rawn hlapchhuak se chuan India dinhmun kha a danglam vek ang," a ti.

World Cup squad-a koh zinga tel lo spinner Harbhajan Singh chuan, "SCG hi khelh harsatna hmun a ni lo. India batsman te khan 'partnership' ṭha tak lan tir tur an nei lo a, kha kha an tuar a ni," a ti.

Cricketer piang tawh zinga ropui ber tih ngam Sachin Tendulkar chuan, "India in an khel ṭha takzet a, World Cup ropui tak min hman tir a ni. Vawiin game kha chu beisei aiin a harsa a, chak phu zawk an chak a ni. Australia ka lawmpui e," a ti.

India batsman ropui ṭhin Sunil Gavaskar chuan, "India khan boruak an zo lo a ni ber. Hmun tinah India khan Australia kha an khan lo a ni. Batting-a partnership ṭha an nei lo kha a pawi ber chu a ni," a ti.