Moto GP 2015 season tlan ṭan a ni dawn ta

Pathianni hian khawvela bike intlansiak ngaih hlut ber Moto GP World Championship chu tun season atan Qatar-ah tlan ṭan a ni dawn ta.

Champion lai Repsol Honda rider Marc Marquez hi tunhnai season thum chu chu tuman an el pha lo a, kuminah pawh hian rider ngaihvenhlawh leh hmuhnawm ber te zinga mi a ni leh ngei ang. First free practice session-ah pawh a che ṭha leh nghal hle a, pakhatna ni leh nghalin a team-mate Dani Pedrosa chu pahnihna a ni.

A zawna World Champion ṭum thum ni mek Marquez chuan, "Nikum aiin ka ṭhat zawk ka ring. Ka nghakhleh tawh hle a, nikum lama kan la tih ngai loh thil thar eng eng emawh hriat belh kan neih avangin a nuam dawn hle in ka hria," a ti.

Tunhnaiah Repsol Honda Team an chungnung hle a, an rider pahnih Marquez leh Pedrosa te hi rider dang tan chuan an hnawksak leh hle ang. Season hmasa khan Marquez hi intlansiak hmasa sawmah pakhatna a ni vek thei tih kan hriat a pawimawh ang.

Rider te an inpeih tawh, eng nge an sawi?

Yamaha bike hmang a World Champion vawi hnih lo ni tawh Lorenzo chuan, "Nikum a ka chetsual tawhna anih avangin ka inzir nasa hle. Ka bike hman tur a ṭha tawk a, ka taksa pawh nikum ai a ka fit bakah ka rihna Kg 5-a a tlakhniam avangin beiseina sang tak ka nei," tiin season tharah beiseina a nei sang hle.

Vawi kua zet World Champion lo ni tawh Valentino Rossi chuan, "Season ṭanni hi chu sikul kai ṭanni ang mai a ni. Nikum aiin inelna a sangin a hautak zawk ngeiin a rinawm a, a nuam in a hautak hle ang," tiin a sawi.

Andrea Dovizioso chuan, "A bul ṭan ṭhat hi a pawimawh rual rualin kum tluan a tlan ṭhat tluan theih hi a pawimawh. Kumin chu intlansiak tikimtu chauh ni loin a ṭha ber pawl kan nih theih ka ring," a ti.

Suzuki Ecstar Aleix Espargaro chuan season thar lo awm tur chu thlirin, "Season tirlam intlansiakah chuan dawhsan rah phak nghal chu a harsa deuh pawh a ni maithei. Kumin aṭanga Suzuki bike ka khalh thei tur hi ka lawm a, kan bike hi a chasis a ṭhat bik avangin beiseina kan nei sang hle," tiin thuhnuairawlh takin a sawi.

Thuthar thehdarhtu ten CWM LCR Honda chu engang chiah nge a nih? tih an zawhna chu chhang in Cal Crutchlow chuan, "A var," tiin fiamthuin a chhang.

Sawi chhunzawmin Crutchlow chuan, "Kan bike thar tur hi a ṭhain ka ringtawk hle a, beiseina sang tak min pe a ni. A tir aṭangin a tlanchak ber zingah tel ka tum dawn," tiin a sawi.