Falcao a la thiam reng

Manchester United striker Radamel Falcao-a'n an Colombia tan goal hnih a khung a, Ningani zan khan international friendly-ah Bahrain 6-0 in an sawp.

Colombia coach Jose Pekerman chuan Bahrain an hmachhawn hma khan Falcao-a'n inrintawkna a tlak chham thu a sawi a, United manager Louis van Gaal-a demna sawi chhuak lo mah se a siam ṭhat theih thu a sawi. Argentine coach Pekerman-a hnuaiah Falcao-a'n starting eleven a chang a, minute 14-na lekah United forward hian Carlos Bacca goal khung tur a siam sak nghal.

Falcao tan inrintawkna nei turin goal a mamawh a, ṭhiante siam sak a tawk lo. Kar khata £265,000 hlawh thei Falcao-a'n a hlawh tam chhan a rawn lantir zui a, darkar chanve pelh hretah minute li chhungin goal hnih a khung.

Second half-ah Adrian Ramos, ram tana koh thar Johan Mojica leh Andres Renteria te'n goal khat ṭheuh an khung leh a, minute 90 a zawh meuh chuan Colombia 6-0 in an chak.

Falcao hian ram tan goal 23 a khung tawh a, Colombia record siamtu Arnoldo Iguaran chu goal khat chiahin a pha tawh lo.

Tunkar tir khan Colombia striker hian bench-a ṭhu reng tur chuan United-ah cham reng thei a nih loh thu a sawi tawh a. English club hian Falcao chelh bet tur hian pound maktaduai 43.5 an mamawh a, amaherawhchu match 22-a khelh tawha goal li chauh a khung avangin Louis van Gaal-a hnuaia khel reng tur chuan match riat khelh hma bakah tun aia a cheṭhat hi a ṭul dawn a ni.

Colombia hian Thawhṭanni hian Kuwait nen friendly match an khel leh ang.

Friendly match results

Egypt 2 - 0 Equatorial Guinea

Ivory Coast 2 - 0 Angola

Bahrain 0 - 6 Colombia

Iran 2 - 0 Chile

France 1 - 3 Brazil

Qatar 1 - 0 Algeria

Thailand 2 - 0 Singapore

Oman 6 - 0 Malaysia

Jordan 0 - 1 Syria

Maldives 0 - 2 Tajikistan