Pathianniah Malaysian Grand Prix

Malaysian Grand Prix chu tun Pathianni hian Sepang-ah tlan a ni leh dawn. Motor intlansiak ngainatu tan chuan hmaih phal chi a ni lo ang.

Pre season test-a a chetsual avanga intlansiak hmasa bera tlan ve thei lo Mc Laren driver Fernando Alonso chu a intlansiak thei tawh dawn a, test pahnih-ah pawh harsatna nei lo in a tlan tluan thei tawh a ni.

Practice hmasaah World Champion Lewis Hamilton tlan tluan thei lo mah se practice vawihnihnaah chuan a tlan ṭha ber a nih tho avangin intlansiak tak tak hunah pawh driver dangte tan chuan a tawrhhlelhawm hle tur a ngaih a ni. Ani hi kar hmasa Australian Grand prix a pakhatna kha a ni.

Driver te an ṭawng chhuak

Spanish driver Alonso chuan, "He hmuna ka intlansiak thei tur hi ka lawm hle, kum 2003 khan a vawikhat nan he hmunah hian pakhatna ka lo ni tawh a, chuvangin ka tan chuan helai hmun hi a hlu hle a ni." tiin a sawi.

Ferrari driver Kimi Raikkonen hi driver hmuhnawm ber pawl a ni leh in a rinawm a, practice naah a tlan ṭhat avangin beiseina a nei sang hle ang. Practice vawihnih an neihah pahnihna a ni ve ve thei a ni.

Raikkonen chuan, "Nikum lam aiin hma kan sawn zel a, Australia-ah khan Mercedes tluk chiah lo mah ila Malaysia-ah chuan a chungnung zawk kan nih theih tawh ngei ka ring, chak ngei turin kan bei ang." tiin chak ngei an inrin thu a sawi ve bawk.