New York City-ah Lampard khel rih dawn lo

Tun hnaiah English midfielder Frank Lampard chuan New York khawpui a tlawh dawn avangin New York City tan khel tur anga sawi a ni. Mahse, New York City FC head coach Jason Kreis chuan hei hi thuthang dik lo niin a sawi. Major League Soccer-ah hian May thla thleng tranfer window hawn a ni a, Lampard hian a duh chuan a contract nghet neihna New York lam hi thla tharah a pan thei dawn a ni.

Lampard hian Major League Soccer team thar New York City tan season ṭan dawn khan Chelsea aṭangin contract a sign a, mahse loan in Premier League club Manchester City a zawm. An inrem dan chuan Lampard hi thlasik transfer-ah New York lamah kir leh tura tih a ni. Mahse, City-ah Lampard a che ṭha a, Manchester City neitu te hi New York City nei tu tho an nih avangin Premier League club lamah hian season tawp thleng cham turin an ti leh si a ni.

New York City FC head coach Jason Kreis chuan Lampard chuan New York khawpui a tlawh ngei tur thu sawiin, Inrinnia MLS match-a New York CFC leh Sporting Kansas inkhel Lampard hian a en dawn thu a sawi a, mahse New York tan khel tawh tura an sawina erawh a pha thung.

Jason Kreis chuan, "Tunah chuan Lampard hian min la rawn zawm dawn rih lo. January-ah khan lo kir tawh turin kan beisei a, mahs e Man­chester lama cham chhun­zawm tur khan thutlukna an siam leh ta zawk si a ni. Nipui transfer-ah kan hnena khel turin a lo kal chauh ang," a ti.

Yankee Stadium-ah media ho kawmin Kreis chuan Lampard nen an inkawm ngei tur thu sawiin an club a khel tura a kir huna an ruahmanna siam chungchang te a sawipui dawn a ni.

New York City FC-a Lampard-a team mate tur Spanish striker David Villa pawh a phur khawp a, "Lampard lo kal hun hi kan nghakhlel tawh em em a, team ṭha leh tlo tak din kan tum avangin Lampard te ang player ṭha leh tawnhriat ngah hi kan mamawh a ni," a ti.

David Villa hian season ṭan dawn khan Atletico Madrid aṭangin free transfer in New York City FC hi a pan a ni.