Brazil dang thei an awm lo

Nikum World Cup a anmahni ram ngei a mualpho tak a an tlak hnuah Brazil in an coach Luiz Felipe Scolari thlak turin tunhma a an lo rawih tawh Dunga an ruai nawn a, an tisual rih lo. Nilaithawhṭanni zan khan France chu an ramah 3-1 in an va hneh.

Dunga-a'n Brazil a vawihnih nan a enkawl hnuah a la chakpui fai vek, July aṭang khan match sarih an khelh tawhah goal 14 khung tawhin goal khat chauh an la chhuah thung.

Paris-ah chuan

Inkhel ṭan hmain Germanwings thlawhna chesual a thi te sunna hun hman a ni a, minute khat stadium-ah mipui leh player te ngawi rengin an ding.

Ball an pet

Anmahni rama khel an ni bawk a, France in inkhel bul an ṭan ṭha zawk. Mual veilam sir aṭanga Mathieu Valbuena ball cross ṭha tak mai chu Real Madrid central defender Raphael Varane chuan minute 21-naah a tauh goal. France in sikhat faiin hma an hruai. Varane-a'n ram tan goal hnih a khung na chiah a ni.

Brazil in thapui an thawh let ve nghal a, Roberto Firmino leh Oscar te inkhawp chuan France tlarhnung an chhaihbuai zui. Minute 40-naah Chelsea midfielder Oscar chuan an si phurh a sut zui ve nghal. He goal hi Brazil tan Oscar-a goal 12 na a ni. First half-ah goal dang a lut tawh lo a, chak zawk tur a la hriat loh.

Second half-ah Brazil an chungnung a, inkhel an thunun. Captain Neymar chuan angle zim tak aṭangin minute 57-ah goal a khung. France in Moussa Sissoko leh Karim Benzema te hmangin goal khungna hunṭha hmu mah se an chhawrṭangkai thei lo. minute 69-ah Luiz Gustavo chuan Willian-a cross ball chu France goalkeeper Steve Mandanda dan hman loh in a tauh goal leh. Khualmualah Brazil an chak a, 2014 World Cup hnua avawikhat nan France an chak lo.

Eng nge an sawi?

France captain Benzema chuan, "Chak loh hi result ṭha a ni ngai lo, mahse keini aiin Brazil kha an khel ṭha zawk a chak an phu a ni. Pathianni a Denmark kan khelh hunah kan result ṭha lo hi kan chhawm loh ka duh a, kan chak ngei ka beisei," a ti.

Brazil manager Dunga chuan, "Brazil khel dan tur takin kan khel a ni. Kan khel ṭha, mahse thisual chu kan nei nual tho a, hmasawn kan la ngai a ni. France kha set-piece-ah an hlauhawm hle a, kan inveng thei kha kan vanneih phah a ni," tiin a sawi.

Dunga-a'n Brazil a vawihnih nan a enkawl hnuah a la chakpui fai vek.

6 September Brazil 1-0 Colombia

10 September Brazil 1-0 Ecuador

11 October Brazil 2-0 Argentina

14 October Brazil 4-0 Japan

12 November Brazil 4-0 Turkey

18 November Brazil 2-1 Austria

26 March Brazil 3-1 France

29 March: v Chile (Emirates Stadium)