Pathianni atangin I League Second Division
India ram club ṭha inelna I League-a tel phak ve ngei tumin Aizawl FC leh Chanmari FC-in Siliguri an pan a, Pathianni aṭangin hna an ṭan dawn. I League Second Divison khel tur team pariat aṭangin team pakhat chiah division sang zawkah an tling dawn.
MPL3 champion Aizawl FC-in an match hmasa ber Lonestar Kashmir FC nen SSB Ranidanga-ah an khel dawn. MPL2 champion Chanmari FC-in Kanchenjunga Stadium-ah Kenkre Sports an hmachhawn ve bawk ang.
Lonestar hmaah Aizawl FC
Aizawl FC-in Lonestar Kashmir FC aiin India ram football-ah sulhnu an nei ṭha zawk. Amaherawhchu India ram football-ah chuan team thar hi zuam ngawt theih a ni lo a, foreigner pakhatin team a ti danglam hlawk thei. Tuna inelnaah hian playing eleven-ah foreigner pahnih a hman theih a, squad-ah pathum a kawl theih bawk. Aizawl FC hian foreigner pathum an nei ve tho a, zam tur an ni lo.
Aizawl FC hi MPL3 champion an nih avangin tun dinhmuna Mizoram team ṭha bera chhal theih a ni. An squad thlira chiang taka lang chu MPL3 ai khan tuna Aizawl FC team hi an ṭha tawh zawk.
Aizawl FC-in keeper Kenneth Malsawmthanga, defender Toky Zomuanpuia, midfielder R. Malsawmtluanga leh Laldampuia bakah forward Alfred Kemah Jaryan te an neih belh.
Aizawl FC technical director Hmingthansanga chuan, "Kan chuanna tur train an cancel avangin Guwahati-ah zan khat kan riah a ngaih phah a, ni khat training kan chan phah. Amaherawhchu kan thlen tlai hi chhuanlam atana hman kan tum lo. Player-te an dam kim a, coach-in duh thlan tur a nei ang. Chak ngei kan tum a, a awlsam dawn lo," tiin a sawi.
Chenna ngai lo ramah
Chanmari FC-in state pawnah inelna an la hmachhawn lo a, team anga Mizoram pawn an vawi khat chhuahna a ni. An match hmasa bera an hmachhawn tur Kenkre FC hian I League Second Division-ah tawnhriat an nei tawh a, record erawh an nei ṭha lo. Nikum khan vawi li khelhah point an hlawhchhuak lo a, Aizawl FC lakah 4-0 in an tlawm bawk.
Chanmari FC hi Aizawl FC ang thoin MPL aiin an ṭha tawh zawk a, Mizoram Police trio F. Lalrinpuia, V. Lalṭanpuia leh Lalbiakhlua te ringawt pawh hi ṭhatpui tham an ni. Chanmari hian MPL-ah foreigner an nei lo a, tunah chuan pahnih Patrick Arol Enonji leh Yinka Joel Sunday te an nei thar tawh. MPL2 champion hian player thar nen game hmuhnawm zawk an khel thei ang.
ROUND 1 : March 29, Pathianni
Chanmari FC Vs Kenkre Sports
Aizawl FC Vs Lonestar
Kashmir FC
Mohammedan
Sporting Vs United Sports Club
PIFA Sports Vs Hindustan FC