World Cup final-ah a thlengtu pahnih

ICC World Cup 2015 hmawr an bawk hnai tawh a, Pathianni zing dar 9:00 khian World Cup thlengtu pahnih New Zealand leh Australia te'n World Cup final an khel dawn a, a boruak a sang tawh hle.

Melbourne Cricket Ground-a inkhel tur an nih dawn avangin Australia in ṭantu an ngah zawkin a rinawm a, an thiamna leh theihna enin chak zawk tura beisei an ni bawk.

Mahse, Asutralia tan World Cup final la khel ngai lo New Zeland hi zuam ngawt chi an ni bik hauh lo. Group stage-a an intawn ṭumin Australia hian Kiwis ho hi an hneh lo tawh a, New Zealand-in group stage-a an record ṭha tak rawn chhunzawm an tum ngei ang. Australia tan tun hi an final vawi sarih khelhna tur a ni a, an champion a nih ngat chuan an vawi nga champion na a ni ang.

New Zealand tan fast bowler wicket 21 la tu Trent Boult-a pawimawh leh dawn a, kumin World Cup -a wicket la hnem ber ni mek hian Australian batting-line up ṭah lutuk hi a vawm darh theih dawn leh dawn loh hi hriat chakawm chu a ni.

Bowling lamah Australia an ngaihtuahawm bik loh a, wicket 20 la tawhtu Mitchell Starc an nei ve tho. He fast bowler hian wicket a la hnem satliah a ni lo a, run a pe tlem thei hle.

Batting lamah Australia in Steven Smith, Aaron Finch, Shane Watson leh Glen Maxwell te an nei a, mamawh huna che ṭha thei ṭhiau an ni. Indian bowler te sawisa tu te hian New Zealand bowler te an ngam ang em? Kan hre thuai dawn e.

New Zealand tan captain Brendon McCullum chet ṭhat a pawimawh leh dawn a, captain ropui hi nau te kaihhruai thiam hmingthang a ni. Kumin World Cup-a WC record siama run 237 vawchhuaktu Martin Guptill an kawl bawk avangin New Zealand batting line up hi an chhe lo.