BCA-in TBL an um zel

Zarkawt BCA-in Samsung 3:16 Plan Solution Mizoram Super League-ah Khatla TBLvawi hnih an hneh lo a, final an thlen chauhin phuba an la thei dawn. BCA-in final thlen ngei tumin Ningani zan khan Chatlang Ryders 86-72 in an sawp.

Chaltlang Ryders-in tlawm reng an duh lo a, Zarkawt BCA hmaah an theihna zawng zawng nen bul an ṭan . First quarter zawhah BCA-in 20-17 chauhin hma an hruai a, intum tawk tihin a sawi theih.

Amaherawhchu second quarter aṭangin team ṭha danglamna a lang a, BCA-in squad an nei chhah tih nemnghetin second quarter zawh meuh chuan 50-28 in BCA-in hma an hruai tawh a, chak tur a chiang tawhah ngaih theih.

Third quarter hnu lamah Ryders Lalmuanpuia Zote leh Lalrinnunga te langsar ve bawk mah se BCA tan buaina tham a tling lo. Zarkawt BCA player tinte an che ṭha tluan a, 86-72 in hnehna an chang.

Chaltlang Ryders assistant coach Marc Lalthlamuana Sailo chuan, "Kan chak lo chhan chu squad inchhah hleih vang bakah second quarter kan khelh fuh lo vang a ni. Season thar kan thlir a ṭul a ni. Chutihrualin result ṭha kan neih loh chuan player ṭha lak luh a har dawn. Tuikual South leh Mission Vikings khan lo hria se, hneh ngei kan tum. Kan ti mai mai dawn lo," tiin theihtawp an la chhuah tur thu a sawi.

Zarkawt BCA assistant coach Lalruatfela chuan, "Khelh dan thar kan enchhin a, a fuh viau chuan a hriat a, amaherawhchu kan khingpuite an pan deuh avangin kan hmasawn dan chiah hriatthiam a har hle," a ti.

Afela chuan sawi chhunzawmin, "TBL ṭum hnih kan hneh loh avangin final sawi ri ngam pawh kan la ni ve lo. Tin, TBL kan hneh hma chu team ṭha hnehah kan in ngai lo," tiin MSL season hmasa ber tawp hma ngeia Khatla TBL hneh ngei a tum thu a sawi.

Zarkawt enkawltu hian fans ṭawiawmna ṭha an neih avanga a lawmthu a sawi tel bawk.