Arsenal chak lo kaltluang a tawp Mahse an la chak zo chuang lo!

Premier League match thum chhung an tlawm zawn hnuah Arsenal chuan point an hmu ve leh ta. An chak loh kaltluang hi tawp mah se Gunners hi an chak ta tihna a la ni chuang lo, an mikhual Southampton nen 1-1 in an inhnehtawk hram.

Nilaini zan inkhelah Gunners captain Pierre-Emerick Aubameyang-a'n goal a khung ve leh ta a, league match bikah Gunners-in minute 797 chhung 'open play' aṭanga goal an neih loh chu a tawp ve chiah.

Auba goal khung vangin an lawm, amaherawhchu an goal hi si phurh sutna mai a la ni. An duh loha an hnawl hnu Theo Walcott-a goal hmahruai khung chu North London club lam hian an sut a, defender Gabriel hnawhchhuah a nih zui avangin chakna goal an khung thei tawh lo.

A tlangnel tawhna Emirates Stadium-ah Walcott a kir a, English forward hian minute 18-na lekah chak taka ball a tlanpui hnuin goalkeeper Bernd Leno chip kumin goal hmahruai chu mawi takin a khung.

Arsenal player hlui hian a chawr chhuahna Saints tan a khel hmuhnawm zui a, a tlan chakna leh chet ranna hmangin tlarhnung a chhaih buai fo. Season kal laia Gunners player khel ṭha tluang bera ngaih Gabriel pawhin a dang zo lo.

Brazilian defender hian Walcott a ven hneh loh vangin a ti tlu a, yellow card pahnihna pek niin an hnawt chhuak. Arteta naute hian si phurh an sut aṭanga minute 10 hnuhah red card an hmu a, point thum hmuh an beiseina chu a zuih ral chhunzawm.

Nikum December thla aṭanga Arteta-a'n team a enkawl hnuah, league bikah pawh Arsenal player pasarih ngawt hnawhchhuah an ni tawh. Tun hnai an match hnuhnung panga aṭangin red card vawi thum an hmuhna a ni bawk, player-ten zuilhtu an mamawh.

Aubameyang-a'n contract a ziah vangin Arsenal an lawm a, an lawmna chu goal hmanga chhan let a ni mai thei si lo. An mahni lamah a ti lut a, lungaihna tizualtu mai a ni. Tunah erawh an khingpui goal lamah a khung ve leh ta.

Arteta-a'n a naute a khelhtir danah fans an lawm lo, a hmuna entu an awm zeuh lai pawhin an au el hman hial. Season duhawm hmang mek Saints lakah erawh hmasawnna hmuh tur a awm, chutih rualin an hun tawn thim tak chu an la kalsan thei lo.

Rawlthar Bukayo Saka a hmuhnawm a, goal an neih theih chhan pawh nghet taka ball a ken ngam vang a tih theih. Saka hian Eddie Nketiah pein, ani hian Auba tan a siamsak leh thung - Inrinni zana Everton an lenchilh hunah pawh goal dang an beisei ngam ang.

Hector Bellerin awm lo mah se Ainsley Maitland-Niles a rintlak viau a, tlarhnung laia chhawr rim Gabriel a awm dawn loh takah chuan David Luiz chungah mawhphurhna a tla leh ang. Brazilian defender Luiz hi a lu hliam a dam tawh.

Arsenal manager Arteta chuan, "Lungngaia indawm kunna hun a awm lo, tunah chuan match khelh hmabaka chak ngei turin inbuatsaihna hun tlemte chauh kan nei. Gabriel kha card a hmuh hmasak khan lak chhuah ka tum a, mahse hun a awm ta lo.

"Aubameyang-a'n goal ṭha tak a khung avangin, inrintawkna leh a ke hmui tak nei let leh turin khatiang goal kha a mamawh a ni," a ti. North London club hian point 14 chauh an la hmu a, insiamṭhat an ngai takzet.

Southampton manager Ralph Hasenhuttl chuan, "Nitinin hma kan sawn zel, player mal bik sawi theih pawh a ni lo an zavaiin an khel ṭha vek. Second half-ah kan khingpui ten khelh dan phung thlakin min nawr na a, khatiang karah pawh kan dingnghet thei kha a lawmawm," a ti.

Hasenhuttl-a kaihhruaina hnuaiah Saints hian season duhawm an hmang mek, match 13 an khelh aṭanga point 24 hmuin pathumna an ni mek. Hmahruaitu Liverpool an phak lohna chu point li chauh a ni. Inrinni zan hian Manchester City an mikhual ang.