Dubai-a Football Five's World Championship khel turin Mizo tlangvalte India-ah champion

Ram 47 inelna tur, Football Five's World Championship Dubai-a khelh turah Mizo team an champion. Nimina Bangalore-a final-ah Mumbai chu 7-2 in an hneh.

He inelnaa Mizoram aiawha khelte hi Flip Flop, Tuikual North an ni. Anni hi Aizawla SPT Sports leh Mizoram Football Association-in January-a Lammuala a buatsaih Mizo­ram chhunga inelnaa champion kha an ni. Bangalore-ah hian khawpui hrang hranga champion-te an inel leh a, Aizawla champion team Tuikual North tlangvalte hi a tawpah an champion ta a, Dubai-h India aiawhin an khel ang.

He inelnaah hian professional footballer-te khelh a rem lo a, amatuer footballer-te inelna a ni.

Inkhelh dan kalhmang

Aizawlah team ṭhahnem tak intih­siakah Flip Flop hi an champion a, inbuatsaihna ṭha tak neiin Bangalore hi an pan. Zote Bakery-in an sponsor a, Rin Rin lamin an jersey an tumsak bawk a, an chungah an lawm hle.

Final round-ah hian Guwahati champion team chu awlsam takin 3-0 in an hneh a, an match hnihnaah Mumbai nen intumin 1-1 in an draw. Point hmu sang pahnihin final an lut a, Mizo tlangvalte hian final an lut ta tho a, Mumbai nen intumin 7-2 ngawtin an chak a, an champion ta a ni.

Lalremruata chu top scorer niin goal sarih a thun a, goalkeeper David Lalchakpuia chu best goalkeeper-ah an thlang.

Flip Flop chu tute nge?

Tuikual North tlangval intelkhawm an ni a, veng dang player pakhat a tel.

Zohmingthanga, David Lalchakpuia, Ramngaihawma, PC Laltlankima Lalremruata, Lorrain Lalrinawma-te hi Tuikual North vek an ni a; Armed Veng aṭangin Vanlaldingliana a tel bawk.

Ṭhianho intelkhawm an ni a, professional football club an ni hran lo. Aizawla inelnaah champion an ni a, India huap intihsiaknaah an champion zui leh ta a ni.

Dubai 2015 Football Fives

Khawvel ram hrang hrang 48-ah he inelna hi kalpui a ni. Ram hrang hranga a tiṭha ber ṭheuhte hian April, 2015-ah hian Dubai-ah 'Football Fives World Championship' hi an khel dawn a ni.

‘Football Fives World Cham­pionship' khel tura an tlin avangin Tuikual North tlangvalte an lawm a, an sponsor-te chungah an lawm a, anmahni puitute chungah lawmthu an sawi a, an kalkawng sialtu SPT Sports leh MFA chungah lawmthu an sawi.