Hurri 'Kane' thlipui a tleh zel

England media lamin Harry Kane-a chanchin ziah nuam an ti a, mipuiin ram tana a khelh hun an nghak a, an nghak chhuak ta.

Wembley Stadium-ah mipui 83,671 an pung khawm a, mipui mit fukna Tottenham Hotspurs forward chu bench-ah ṭhuttir a ni. Zirtawpni zan inkhelah hian England-in inkhel an thunun a, Kane luh hmain Wayne Rooney, Danny Welbeck leh Raheem Sterling te'n goal an khung tawh a, 3-0 a nih tawh avangin mipui ṭhawn leh dan tur a vâng tawh hle.

Amaherawhchu, minute 72-naa captain Rooney thlaktu hi England mipui titi 'Kane' a ni tlat. Spurs goal khung khawl hian England tana goal khung nan second 79 chiah a mamawh a, minute 73-naah vei lam aṭanga Sterling-a cross ball chu inrintawkna nen a tauh lut. England mipuiin an duhthusam, an beisei ngam loh an hmuh avangin Wembley Stadium-ah thawm a ṭha hle.

England 4-0 in an chak a, English media-te'n an zia an chhuah a, man of the match Arsenal forward Welbeck aiin Kane chanchin sawi nuam an ti. Chanchinbu zawng zawngin Harry Kane-a goal khung lawm lai thlalak lian tak takin an tar chhuak a, headline pawh a ngaihnawm hlawm hle.

Daily Express chuan rang takin goal a khung tih lantir nan 'Hurry Kane' tih an hmang a; Daily Mail chuan Prince Henry of Wales (Prince Harry) hming chawiin thu puiah 'Prince Harry' tih an hmang a; Daily Star-in 'Kane You Believe It?' tihin goal khungtu pawhin mak a tih ve tho ringin zawhna an zawt let a; The Sun chuan 'Coming to get Roo' tih an hmang ve bawk.

Minute rukna leka goal khungtu Rooney hian ram tan goal 47-na a khung a, amah ang bawka Manchester United legend Bobby Charlton-a record lo siam tawh tluk turin goal hnih chiah a mamawh tawh.

Goal khung tam lama Charlton leh Rooney inkara awm Gary Linekar chuan, "Ball vawi 50 dang a khawih ang a, Harry Kane-a'n Sir Bobby Charlton-a goal khung record a lehpel ang," tiin goal 48 khung tawh English forward chuan Kane a dah san thu twitter-ah a ziak.

Twitter-a thuziak hi tweet an ti a, Kane-a'n goal a khung aṭanga minute khat lek khan Spurs forward hming lamna tweet hi 11,487 a awm hman hial.

Kum 21-a upa Kane hian a club khelh mekna Tottenham tan tun season-ah goal 29 a khung tawh a, England tana a inlan na hmasa berah goal a khung nghal bawk avangin a chanchin an sawi zui vak hi a mak hran lo hle.

England manager Roy Hodgson chuan, "Thawnthu ang mai a ni a, thawnthu a thlen dik hi chuan a lawmawm a. Harry-a mumang pawh a thleng dik a ni. Season ṭha tak a hmang a, rama tana a goal hmasa ber khung tur khan a ti ṭha hle," tiin a fak.

England captain Wayne Rooney chuan, "Ram pumpui a ti phur hi ropui a ni. Premier League-ah goal ak hung a, ram tan pawh a khung zel. Kan khianga a awm hi kan lawm a, a chetṭhat zel hi kan duh a ni," a ti.

Lithuania coach Igoris Pankratjevas chuan, "A pet goal thei tih nemnghehin a awm. Striker ṭha tak a ni," tiin fak chawp mai mai a nih tawh loh thu a sawi.

Goal khungtu Kane chuan, "Zan duhawm takah ka duhthusam a thleng dik a, ka theihngilh tawh ngai lo ang. Naupan lai aṭanga ka ngaihtuahna kha a takin a thleng a, minute tin ka hman danah khan lungawi a, ka hlim bawk," tiin a sawi.