Bale leh Wales-in France an hnaih

Inrinni zan Euro 2016 qualifier-ah Wales-in Gareth Bale-a goal hnih leh Aaron Ramsey goal khat hmangin Israel 3-0 an hneh a, Group B hmahruaitu an ni.

Inkhelh hmain Israel hi Group B hmahruaitu an ni a, Wales manager Chirs Coleman-a'n Euro 2004 play­off-a Russia an hneh an hneh loh hnua inkhel pawimawh ber a nih thu a sawi.

1958 World Cup hnua inelna lian la hmachhawn lo Wales hi vawi thum an chak tawh a, vawi hnih draw neiin kum 12 hnua qualifier-a bul an ṭan ṭhat ber ṭum a ni.

Haifa-ah mikhual team an che ṭha zawk a, Israel pawh goal hmaah hlauawm lo tawp an ni bik lo. First half tawp hma hretin goalkeeper Wayne Hennessey ball pet chhuah chu Bale-a tauh pialin Arsenal midfielder Ramsey-a'n keeper a pet khum a, first half-ah 1-0 a ni.

Second half ṭan aṭanga minute ngana lekah Bale-a'n freekick aṭangin hmahruaina a nemnghet a, inkhel entura zin Wales ṭantu mipui 950 bawr vel thawm a ṭha hle.

Goal luh hnuah Israel Eytan Tibi-a'n Bale laka a foul vangin yellow card vawi hnihna a chawi a, hnawhchhuah a ni. Wales dinhmun a ṭha sawt. Minute 77-naah Ramsey-a'n khawvel player manto ber tan ball ṭha pe a, Bale-a'n goal-ah chantirin 3-0 in inkhel a tawp.

Wales manager Chris Coleman chuan, "1958 hnua Wales team ṭha ber ka ni tih kan lantir thei a ni. Anni kha World Cup khel thei an ni a, an ṭha a ni. 1994 World Cup leh Euro 2004-ah teuh deuhin kan tling zo lo a, tunah chuan chetsual a thiang lo. Tuna kan team hi ṭhenkhat chuan golden generation angin an sawi a, mah se hetiang pu pha tur chuan kan hlawhchhuah a ngai. Hmabak thui tak a la awm," tiin a sawi.

Belgium tan Fellaini

Marouane Fellaini-a'n Manches­ter United tan a theihna a phochhuak ṭan a, Belgium tan a ṭhulh duh chuang lo. Inrinni zana Cyprus 5-0 a an sawp ṭum United midfielder hian goal hnih a khung a, hetiang zat bawk hi Chelsea midfielder Eden Hazard-a'n a khung ve bawk.

Goal ngana khungtu chu Michy Batshuayi a ni a, ram tana a vawikhat inlanna a ni.

Belgian coach Marc Wilmots chuan, "Player-te khan nuam ti takin an khel a, an tih turah an chiang a. An khelh danah khan ka lungawi a ni," tiin a sawi.

Belgium hian qualifier-ah bul an ṭan ṭha bik lo a, Cyprus an sawp hma hian vawi thum khelhah vawi khat chiah an chak a, vawi hnih an draw.

June thla khian Belgium hian khualmualah Israel hnehtu Wales an hmachhawn leh ang.