Hiddink-a hnuaiah Netherlands an buai

Euro qualifier Group A-ah hmahruaitu Czech Republic-in Latvia draw mah se Netherlands-in hun ṭha bawhpelhin, Inrinni zan khan Turkey lakah point khat chauh an hlawhchhuak.

Amsterdam Arena-ah Burak Yilmaz hmangin Turkey-in first half-ah hma an hruai a, injury time-ah Wesley Sneijder ball petin Klaas-Jan Huntelaar a per lehin mualneituin an siphurh an sut hram.

Dutch player hlui Ronald de Boer chuan November thla khan manager Guus Hiddink chu game plan nei lo tiin a lo sawisel tawh.

Netherlands hian match nga khelh zawhah point sarih chauh an la hmu a, an chungah Czech Republic (13 Pts) leh Iceland (12 Pts) te an awm.

Kum 68-a upa Hiddink chuan, "Holland team hi an ṭhat theih dan berah ka hruai kir leh theih ang. Amaherawhchu tunah chuan a kalkawng ka la hre fuh lo. Turkey lakah kan khel ṭha lo a, kan result erawh a lungawi thlak thung. World Cup-ah pathumna kan ni a, kan result hlawhchhuah dan kha en ula, kan vannei tel a ni. Kan team hi khawvela ṭha ber kan ni lo a ni," tiin a insawifiah.

Zirtawpni zan inkhelah Spain-in Alvaro Morata goal hmangin Ukraine 1-0 in an hneh. Spain boss Vicente del Bosque chuan Manchester United keeper David de Gea aiah veteran keeper Iker Casillas a ring zawk. Spain hi Group C-ah pahnihnaah an awm mek. Barcelona right back Jordi Alba a inhliam a, a tlem berah ni 10 chhung a chawlh a ṭul dawn.

Real Madrid playmaker Martin Odegaard-a'n Norway tan starting eleven a chang a, kum 16 leh ni 101 a upa niin European Championship qualifying match khel thei naupang ber a ni. Amaherawhchu, Group H inkhelah hian Norway hi Croatia-in 5-1 in an sawp.