MSL a hmuhnawm tulh tulh

Samsung 3:16 Plan Solution Mizoram Super League-ah inkhel a hmuhnawm tulh tulh a, beisei loh result leh inlehthal ropui tak hmuh tur Zirtawpni khan kan hmu. Inkhel hmasa zawkah Khatla TBL in Tuikual South 63-59 in an hneh a, inkhel hnuhnung zawkah Zarkawt Serpents in 78-72 in Mission Veng Vikings an hneh bawk.

Inkhel hmuhnawm chu

Zirtawpni tlai dar 4:00-ah Hawla Indoor Stadium a lun a, MSL-a ṭantu ngah pahnih Khatla TBl leh Tuikual South an intum dawn vang a ni.

Inkhel an ṭan a, team pahnih an inhlau lo tawn hle. Round hmasa lamah inkhel inhnehtawk takah TBL in Tuikual South an lo hneh tawh a, Khatla lakah Tuikual South in tlawm nawn an tum lo.

First quarter aṭangin an in um tawn nghal zak zak a, dan pangngaiin Tuikual South tan points 17 score-a rebounds 6 neitu captain F. Zodinthara leh points 12 hlawhchhuaktu Vanchuangpuia te an hmuhnawm leh a, an ni pahnih hi Tuikual South innghahna a ni. Tuikual South in Khatla TBL an tum hmasak a an neih loh Rakesh-a an nei tawh bawk a, Haryana tlangval ft6 leh inch 2 a sang hian TBL player-te a chhaih buai hneh hle.

Khatla TBL tan coach-cum-player H. Ladinsanga (Mapuia) chu an innghahna a ni. BCA an hneh ṭum ang bawkin points 19 score tu Mapuia hian inkhel bul a rawn ṭan a, a nau te tana a ṭangkai zia chu a inkhelah kan hmu.

1st quarter aṭanga 4th quarter thlengin team pahnih an i um tawn zak zak a, inkhel hmuhnawm tak a ni. Minute khat chiah a awm tawh tihin Tuikual South in point hnih in hma an hruai a, chak thei dinhmunah an ding.

Mahse Tuikual South tan an player tawnhriat nei ngah pahnih Dina leh Chp-a te'n an tih tur an ti lo a, second tlemte chauh a awm tawh laia hmahruaitu zawk team hian boruak an zo lo nge an khel a buai a, hmanhmawh taka an khelh avangin an chesual a, a tawpah Khatla TBL zawkin hnehna an chang ta a ni.

Zarkawt an chak zawn e

Zarkawt Serpents in MSL inkhel hmasa panga a chak hmel an hmuh loh hnuah Chaltlang Ryders an hneh a, tunah Mission Veng Vikings an hneh leh ta.

Inkhel ṭan tir aṭangin team pahnih an inhnehtawk a, an in um tawn zak zak. Zarkawt Serpents tan an veng pa Lalsangkima a che ṭha a, points 22 zet a rawn score. Champhai tlangval R.Lalruattluanga'n a theihna a lantir bawk a, points 16 zet score in rebounds pakua zet a nei thei.

Mission Veng Vikings in beisei an phak lo. An player zingah mahni team chakpui zo tur khawpa khel chhuak ṭha an awm lo a, hei hi an tuar a tih theih awm e.

Zarkawt Serpents in an zia tak tak an chhuah ṭan a, table mawngphah a awm hman kha tunah chuan palinaah an in vawrh chho ta.