Rooney-a'n Sir Bobby Charlton a la hnaih lo - Hodgson

England player ropui zinga tel turin Wayne Roo­ney-a'n ram tan inelna lianah a chetṭhat a ngai, he thu hi tuna Eng­land manager Roy Hodgson-a ngaihdan a ni.

Manchester United for­ward Rooney hian ram tana Sir Bobby Charlton-a goal khung zat goal 49, tluk turin goal hnih chiah a mamawh tawh. Amaherawhchu, England boss chuan Rooney hian Charlton-a elpha turin goal khung record siam a tawk loh thu a sawi.

England manager Hodgson chuan, "Bobby tluk pha tur chuan Euro­pean Championship emaw World Cup-ah emaw a chet ṭhat ve a ṭul a ni. England player ṭha bera Bobby chhal hi hnialtu an tam khawp ang. Amaherawhchu ka kum rualpuite chuan player ṭha pathum an thlan chuan Bobby hi an hmaih lo ang," tiin kum 67-a upa chuan a sawi.

Liverpool manager hlui chuan sawi zelin, "Wayne hian record hi a siam thei a nih chuan a ropui khawp ang, ka dah hniam lo. Chutihrualin, kei chuan Bobby Charlton hi ka dah sang a, tuna player-te hian an tluk pha dawn a nih chuan hun an mamawh ang," tiin United legend Bobby Charlton a ngaihsan zia sawi.

England hi World Cup-ah vawi khat chiah an la cham­pion a, kum 1966 khan Bobby Charlton hian England hi an ramah a champion pui tawh a, a hun lai hre pha tan dah hniam a thiang lo.

England hian 2014 World Cup-a an mualpho hnuah a zawnin vawi sarih an chak tawh a, Euro 2016 khel turin an dinhmun a ṭha viau bawk.

Hodgson chuan, "An hre reng ang. England tana vawi 100 chuang khel thei kan ngah lo a, ram tana captain armband hreng thei an tam lo. Rooney hi an theihngilh hlau suh u, an hre reng dawn," tiin Rooney sul­hnu pawh hriat reng tlak a nih thu a sawi.