I League 2nd Division Chanmari FC-in Kenkre an sawp nghal

Mizo mipui tana ngaihthlak nuam chan­chinthar Chanmari FC-in an rawn chhawp chhuak e. Pathianni zing khan Chanmari FC-in I League second division-a an game hmasa berah Kenkre FC 4-1 in an sawp.

Aizawl FC leh Lone­star Kashmir FC te inkhel tur erawh an khelhna hmun tur SSB Ranidanga pitch ṭhat tawk loh vangin hemi field-a inkhel tur dang PIFA leh Hindustan te nen vawiinah an inkhel thung ang.

Kanchenchunga Sta­dium, Siliguri-a inkhelah hian Chanmari tan Mal­sawmfela leh leh F. Lalrinpuia te'n goal khat ve ve an khung bakah Nigerian forward Joel Sunday-a'n goal hnih a khung a, Kenkre tan Yash Mhapre-a'n goal khat a khung ve bawk.

Inkhel chu

Chanmari-in bul an ṭan ṭha a, minute 15-naah yard 20 vel aṭangin Sawmfela'n kawh zetin goal kil takah a pet lut a, Kenkre keeper tan dan rual a ni lo. Chanmari an che ṭha chhunzawm a, darkar chanve pel hretin Nigerian forward Joel Sunday chuan a club thar tana a game hmasa berah a pet goal. First half-ah 2-0 a ni.

Second half-ah Chan­mari bawk an che ṭha a, Joel Sunday-a'n team thawhrah sengin minute 47-naah goal hnihna a khung a, Valpuia'n goal lina a khung chhunzawm bawk. Darkar khat pelh hnuah Kenkre-in Mhapre hmangin khung mah se Chanmari tan hlauhthawn tur a awm lo a, bench aṭangin midfielder V.Lalṭanpuia, Rochhingpuia leh Lalrinfela te an lut a, 4-1 in MPL2 champion teamin hnehna an chang.

Eng nge an sawi?

Chanmari FC head coach H. Vanlalthlanga chuan, "Kan khingpuite an chhe lo a, amaherawhchu kan training angin kan khel thei a, duhthusam result kan hlawhchhuak a ni. Kan player-te khelh danah ka lungawi khawp mai, vanneih ṭum chu ni se goal li aia tam khung thei kan ni," tiin an khelh dana a lungawi thu a sawi.

Reitlang aṭanga an lak Patrick-a chungchang sawiin Thlanga chuan, "A chau deuh a ni. Tlar hnung a puih bakah tlar hma a pui nasa hret a, a tih tur a la bel lo deuh. Inkhel thlirtu tan chuan a khel ṭha lo maithei a, mah se coach mit aṭang chuan a ṭha a, a ṭangkai bawk," tiin a sawi. Cameroon midfielder hi second half-ah Chanmari tlangval Rochhingpuia'n a thlak.

Fixture danglam

Aizawl FC technical director Hmingthansanga chuan, "Fixture dang­lam hi kan tawrh phah ka ring lo. SSB Rani­danga khelmual aiin Kanchenchunga Stadium a ṭha zawk a, khelmual ṭhaa khelh hi kan duh dan vek chu a ni," tiin fixture danglam vanga an buai loh thu a sawi.

Fixture thar chu
ROUND 1 : March 30, Thawhṭanni
9:30 AM Aizawl FC Vs Lonestar Kashmir FC
3:15 PM PIFA Sports Vs Hindustan FC
ROUND 2 : April 1, Nilaini
9:30 AM Kenkre Sports Vs Aizawl FC
3:15 PM Hindustan FC Vs Chanmari FC
ROUND 2 : April 2, Ningani
9:30 AM Mohammedan Sporting Vs Lonestar Kashmir FC
3:15 PM PIFA Sports Vs United Sports Club