Awlsam takin Australia an champion

ICC World Cup 2015 chu nimin khan Melbourne khawpuiah khelh zawh a ni ta. World Cup final-ah hian kumin World Cup thlengtu pahnih Australia leh New Zealand te an in tum a, vawi li champion tawh Aussie ho chuan Kiwis ho beiseina thaibo sakin wicket sarih in hnehna an chang.

Melbourne Cricket Ground-a inkhelah hian Australia tan bowler pahnih Mitchell Johnson leh James Faulkner te an che ṭha a, wicket thum ve ve la in New Zealand batsman te an sawisa.

Ṭhumvawra vannei zawk New Zealand in bat hmasak an thlang a, an thlang fuh lo. Semi-final a South Africa hnawtchhuaktu Grant Elliott chu New Zealand tana khel ṭha awmchhun niin ball 82 a hmachhawnah run 83 a vawchhuak. Mahse, Elliot hi a ṭhian te'n an thlawp ṭha tawk lo a, captain Brendon McCullum chu hun pawimawhah run siam miah lo in a out. New Zealand batsman te'n Australian bowler te an ngam lo a ni ber a, over 45-ah Black Caps ho an vaia out vekin run 183 an tlin hram. Batsman nei ṭha Australia tan hei hi um huphurhawm a ni lo.

Australia an bat a, opener Aaron Finch chu run siam miah lo in out mahse run 56 vawchhuaka a tawp thleng dam Steven Smith leh run 74 vawchhuaktu captain Michael Clarke te an che ṭha a, over 33.3-ah Australia in mi pathum chiah hlohin run 186 an vawchhuak a, harsatna tawk lo in Australia chu a vawi nga nan World Champion an ni leh ta a ni.

Eng nge an sawi?

Australia coach Darren Leh­mann chuan, "Nitin mai hian kan ṭha tawlh tawlh ni berin ka hria. Ka palyer te hi chu an danglam bik a ni. Mipui ṭawiawmna kan hmuh zozai hi awihawmloh khawpin a ropui a ni. Ka bowler te'n bul an ṭan ṭhat avangin kan chak a ni,"a ti.

Australia batsman Aaron Finch chuan, "Naupan lai aṭang tawha ka lo mangphan tawn ṭhin chu vawiinah hian a thleng dik ta. World Champion nih hi a nuam a, a bik takin Melbourne Cricket Ground ngeia champion hi ka tan chuan a ropui dan a danglam lehzual a ni,"a ti.

New Zealand captain Brendon McCullum chuan, "World Cup ropui tak kan khel a, mahse zaninah chuan team khel ṭha em em mai Australia kan hmachhawn a, chak an phu zawk a ni,"a ti.