Champions League Hliam ngah Liverpool leh City inlan dawn

European football ngaina-tute tan zaninah men reina tur a awm dawn a, Champions League-ah Premier League champion Liverpool leh Manchester City an inlan dawn. 

Team pahnih hi zan dar 12:30-ah ve ve an inlan dawn a, Reds-in khualmualah Ajax an lenchilh dawn avangin Porto mikhualtu tur City ai chuan an hmabak hi hautak zawkah ngaih a ni. 

Liverpool hian an defender chhuanvawr Virgil van Dijk hliam vanga chanchin lawmawm lo an neih rualin Netherlands lam pana an chhuah nghal a ngai a, Ajax tan Reds hmachhawn dawn rau rau chuan tun hi Liverpool mikhual châkawm lai tak a ni thei. 

City erawh league match hnihah a zawna an chak zawh loh hnuin team ṭha Arsenal lakah 1-0 in an chak leh tawh a, Etihad Stadium a khel tur an nih bawk avangin inrintawkna nasa tak nen  Porto an mikhual thei ang. 

Tun dinhmuna Liverpool hrilhfiahna ṭha ber chu 'damdawi in' tih hi a ni a, Reds hian an thiampuipa VVD chu thla engemaw zat an chhawr thei dawn lo chiang a, goalkeeper Alisson Becker, midfielder Naby Keita, Alex Oxlade-Chamberlain leh Thiago Alcantara-te chu an inhliam mek bawk. 

Keita hian club training a zawm leh tawh avangin zanin inkhelah Jurgen Klopp-a'n a duh phawt chuan a chhawr thei dawn tih a chiang a, hetihlai hian Thiago dinhmun tur erawh he thu buatsaih thleng hian a la hriat loh thung. 

Klopp chuan, "Hliam hlauhawm tak chu a ni lo a, mahse Ajax laka ka chhawr theih dawn leh dawn loh erawh ka la sawi thei lo," a ti a, Alisson leh Chamberlain-ten ngai an awh chhoh thu a sawi bawk. 

Mahse, Ali leh Ox hi an inlan theih erawh a la rinawm loh a, Liverpool tlarhnung phui chhan VVD leh Alisson tel loa Ajax laka Reds khelh dan tur hi hmuh a châkawm takzet.

 

Aston Villa lakah 7-2 in an mualpho a, chhuanlam tur a awm lo. Everton lakah insiamṭhat tum mah se Liverpool vanneih loh ṭum a ni a, 2-2 in an inhnehtawk - Jordan Henderson goal khung pawmsak an nih loh avangin Liverpool hi point hloh zawka sawi theih an ni.

Reds hian Merseyside derby-ah point an hloh a ni mai lo a, Van Dijk an chan tel - fans an hnual a, Liverpool boruak ṭhat lai a ni lo ang tih a chiang. Mahse, hetichung hian Klopp chuan inkhel hmachhawn tura a phur thu a sawi. 

German coach chuan, "Kum hnih liam ta velah khan Champions League hmuh-nawm tak khelin semifinal an lut a, mahse anni hma-chhawnna remchang kan neih erawh Tottenham Hotspur vangin a thleng ta lo. 

"Zaninah kan intawng thei dawn ta a, ka phur takzet a ni," a ti - Klopp hi a phur angin hlim takin a haw ang em, tih erawh chhan harsa tak a ni rih. 

Champions League 2019 final an luhnaa Ajax player pawimawh engemawzat chuan Dutch club hi chhuahsanin sum tam zawkna European club dang an zawm a, Ajax hi thawnthu hlui nena hmeh bel reng an rem lo. 

Mahse, he team hi ṭha tak erawh an la ni - tawnhriat nei ṭha Klaas-Jan Huntelaar, Daley Blind, DusanTadic, Quincy Promes leh Davy Klaassen-te ho an la kawl avangin Champions League boruak sangah an talbuai lo ang tih a chiang. 

Tlarhmaa Brazilian forward Antony hian Sao Paulo aṭangin Ajax hi tun season-ah a zawm ve chauh a, match ngaah goal thum khung tawhin a tlangnel tih a pholang. 

Liverpool tlarhnungah VVD tel loin Joe Gomez  leh Joel Matip chu inkawp tura ngaih an ni a, hna an ngah dawn - hetihlai hian khawthlang media lam chuan Matip hi a inhliam niin an tarlang a, Liverpool tan fiahna a awm chho zel. 

Premier League a Liverpool elpui ber tura ngaih chu Manchester City an ni - Reds hi VVD an chan tak avangin an dinhmun a chhe ta hretah ngaih a ni a, mahse Pep Guardiola enkawl team hi club damdawi in lun hmasa zawk an ni. 

City hian zanin Porto an hmachhawnna tur inkhelah hliam vangin Kevin De Bruyne an chhawr thei dawn lo a, season hmasa lama an talbuaina ngaiah bawk buai nawnin  Aymeric Laporte, Oleksandr Zinchenko leh Benjamin Mendy-te chu hliam vangin an chawl mek. 

Pep-a tana thu lawmawm erawh Sergio Aguero a dam leh ta hi a ni a, Porto tlarhnung tan Argentine striker ven hi hna awlsam a ni lo ang tih chu a chiang. 

Porto hian Ivan Marcano leh Mouhamed Mbaye an inhliam tih loh chu an squad aṭangin duh an thlang thei dawn. Hriat tel tur erawh Portuguese club hian an duh angin league lamah season bul an ṭan bik lo a, match li an khelh tawhah vawi hnih chiah an la chak - City laka chak tura dah ngam an harsa.