Marin Cilic hnehtu Thiem a tlang

Dominic Thiem-a'n Grand Slam nomawi chawi a tumna kawngah a hmaa awm a paltlang zel. Nimin zing khan Austrian tlangval hian 2014 US Open champion Marin Cilic chu 6-2, 6-2, 3-6, 6-3 a hnehin last 16 a inhlangkai.

Arthur Ashe Stadium-a inkhel tir lam set hnihah Thiem a chungnung hle, winners vawi 18 vaw chhuakin unforced errors ṭum li chauh a nei; a khingpui service chhuhsak theihna hun ṭha a neih zinga pali ti hlawhtlingin bul a ṭan fuh takzet.

Set thumaah Cilic rawn ding chang ve mah se, set linaah Thiem bawk a che fuh; Croatian star Cilic-a'n 3-2 a nih laiin break point vawi thum a hmuh a chhawr ṭangkai lo a, game a lak loh bakah a service hloh zuiin a tlawm zawkah a ṭang.

Dominic Thiem hian theihna a nei sang, French Open-ah final vawi hnih thleng tawhin a chak lo thung. January thla khan Australian Open final a thleng leh a, world number 1 Novak Djokovic a ngam lo - New York khawpuiah hian major title beiseina a nei sang tawh hle.

Kum 27 mi Thiem chuan, "Duhthusam thlapin ka la khel chhuak lo, match ka khelh apiangah hmasawnna ka neih avang erawh chuan ka lawm. Tawnhriat nei leh sulhnu nei ṭha ka hneh thei a, hei hian inrintawkna min pek belh ang," a ti.

Seeded pahnihna Thiem-a'n quarterfinal lut tur chuan seeded 15-na Felix Auger-Aliassime a paltlang leh a ngai ang. Canadian rawlthar hian Corentin Moutet chu 6-1, 6-0, 6-4 in a lo hneh ve bawk; a match hmasa lamah Andy Murray a hneh tawh bawk avangin Thiem nen an inkhel tur hi a hmuhnawm ang.

Season hmasa US Open pahnihna Daniil Medvedev chuan world number 138 JJ Wolf chu 6-3, 6-3, 6-2 in a hneh. Russian tlangval hian kumin US Open-ah match thum khel tawhin set a la hloh miah lo; seeded chang phak lo Frances Tiafoe nen an inkhel leh dawn a ni.

Kum 24 mi Thiem chuan, "Thla ruk chhung ka inkhelh loh hnuah tournament kan khel leh chauh a ni a, ngai ka la awh tak tak lo. Match hmasa pathumah set ka hloh lo hi chanchin ṭha a ni, inelna hi kar khat chhung khelh chhunzawm tur a la awm avangin court chhunga hun hman rei loh a pawimawh," a ti.

Inkhel dangah seeded palina Stefanos Tsitsipas chu Borna Coric lakah 6-7 (2-7), 6-4, 4-6, 7-5, 7-6 (7-4) in a chak lo. Vasek Pospisil, Alex de Minaur, Matteo Berrettini leh Andrey Rublev te erawhin an khingpui ṭheuh an hneh thung.