Mancini naute an chak lo

Season thar inbuatsaih naah Inter Milan an che fuh lo. Ningani zan khan Roberto Mancini naute hi CSKA Sofia lakah 2-1 in an tlawm.

Brunico-a inkhelah Bulgarian club tan winger Arsenio Nunes chuan minute 10-na lekah goal hmahruai khungin Inter a barakhaih. Nerazzurri tan Argentine forward Rodrigo Palacio chuan goal an phurh aṭanga minute li hnu lekah chhang let mah se Bulgarian midfielder Yordan Yordanov-a'n second half-ah goal a khung leh avangin Inter an chak lo.

Serie A club lian hian bench-a an ṭhut chawlhtir Mauro Icardi leh Stevan Jovetic te luhtir leh hnu-hnawh mah se awmzia a awm thui tawh lo a, season thara Juventus, Napoli leh AS Roma te elpha tur chuan an insiam ṭhat hle a ngai tih a chiang.

Inter manager Man-cini chuan a naute khelh dan chu zirchian ala ngaih thu a sawi zawhah Manchester City aṭanga Yaya Toure an lak dawn leh dawn loh an zawhna chhang nghalin, "Yaya hi khawvela midfielder ṭha berte zinga mi chu a la ni chiang. Mahse, club CEO Michael Bolingbroke nen kan inhmu a, transfer chungchang kan sawi lo. Ani hi kan hnena a rawn kal ka beisei lo," a ti.